تامر عاشور يرد على تصريحات عمرو مصطفى: يقدر يأخد حقه قانوني.. أنا احترمتك وأنت إضافة لأي مطرب غيري
حرص النجم تامر عاشور على الرد على ما قاله عمرو مصطفى في برنامج “حبر سري”، حول سرقة تامر عاشور ألحان أغنية منه.
وكتب تامر عاشور عبر صفحتة الشخصية بموقع التواصل الاجتماعي "فيسبوك"،منشورًا قال فيه أن أغنية الرك على النية من ألحان عمرو مصطفى بالفعل، مُضيفًا: "ردًا على عمرو مصطفى، أغنية "الرك على النية" ألحان عمرو مصطفى وفي أي حفلة ومكان بقول كده والملحن اللي باعهالي المُقتَبِس الحقيقي، عمرو مصطفى مجبش سيرته نهائي مش عارف إزاي مع أنه عارفه من ٨ سنين لما قفلنا الموضوع ده "انا وهو “ في مكالمتنا مباشرة”.
تامر عاشور: أنا مالي ده صراع مبدعين
وأضاف:" وبعدين أنا مالي ده صِراع مُبدعين ويقدر يأخد حقه قانوني ويوقفها محدش منعه أنا أداه على كلامه ده غير إن الاستعانة بعمرو مش صعبة واشتغلنا مع بعض أغنية "انطق"، كل الحكاية أنه معرفش يجاوب على السؤال "الصناعه انهارت إزاي وأنت عمود من عمدان الصناعة؟ السؤال اللي مش هتلاقي له إجابة مهما توّهت الناس اللي كلهم قالولك أنك مجاوبتش بمنتهى الوعي، وأنا الحقيقة، كنت مُنتظر إجابتك علشان اقولك الصناعة فيها كام عمود غيرك وكام مُطرب عمل تاريخ وعلامات من غيرك ومنهم أنا وكام مُلحن وشاعر وموزع أشترك في نجاح مطربين واعلانات وتترات وكل حاجه حصلت عادي بدونك".
وأكد تامر عاشور على أن عمرو مصطفى قد قل في نظره بعد تصريحاته عنه، قائلًا:" إني احترمتك أو على حد قولك إن تامر وهو بيكلمني "كان واقف كدهو " طبعًا احترمك واقدّرك أنت أستاذ كبير بس قلّيت في نَظر تلميذك لما اتكلمت في التلفزيون عن أن فيه حد عمومًا احترمك وكأنه حدث جلل لأستاذ كبير زيك في النهاية أنت مُلحن كبير مقامًا وفنّا وإضافة لأي مُطرب غيري، هي الظروف حكمت كده ولا تاريخي فيه عمرو والعكس صحيح، ومش هفوت الفرصة دي إلا وأشكر كل الفنانين الكِبار المصريين المبدعين شعراء ملحنين موزعين اللي اتشرفت بالعمل معاهم على مدار ٢٠ سنة وحطوني في مكانة أنا مكنتش أحلم بيها وسط الجمهور العربي كله اللي بنحاول نقدمه إبداع حقيقي مهما زادت بنّا المناواشات الواردة التي لا تتخطى حاجز الأدب والصداقة والمحبة والود ولمصلحة نجاحنا واستمراريته بفضل الله ثُم فضلكم، أشكر أعظم فرقه موسيقية بشتغل معاها جوه وبره مصر اللي بيخلوني قادر على "التصدير الدائم والمختلف" للفن المصري الرائع بحضوري كفرد من تلاميذ لأساتذه كبار حقيقيين".
وحرص تامر عاشور في نهاية حديثه على أن يشكر مصر وكل من ساعده في النجاح الذي وصل إليه، كما وجه الشكر لجمهوره، قائلًا: "أشكر "مَصر" حبيبتي فعلًا دون إدّعاء ولا مُذايده ولا حتى أغاني، جمهورها اللي على كل الأذواق اللي بيسمعوا كل حاجه وكل لون وكل خَبط ورزع وفي الآخر ياخدوا الحلو ويعيش معاهم ويصدروه، ويرموا الوحش وباب النجاح لأي فنان عربي، اشكر بلدي السعودية وجمهورها اللي ضاف لتاريخي واسمي وتشكيل كيان محترم لحفلات عالميةحرفيًا ومش من مرة واحدة بدأت هناك خطوات ومجهود وتعب ومُساندة وهكذا، إلى أن تمت النجاحات الكبيرة، الحمد لله ومنها إلى كل الدول العربية اللي أعشق جماهيرهم وحبهم للفن المصري عموما الموضوع كبير قوي يا أستاذ عمرو تيجي حضرتك يا أستاذ في الآخر تقول عليا اني مثل حي لإستباحه جُمل لحنية لناس عايشة بالباطل وعايز بعيونك الحلوة دي تشوف خير في الصناعة؟".
تصريحات عمرو مصطفى
وجاء ذلك بعد التصريحات الذي أبدى بها عمرو مصطفى في برنامج "حبر سري"، قائلًا: "يا تامر فيه أغنية عملتها لمصطفى صندل التركي، انت أخدت اللحن والتوزيع الموسيقي ونزلتها أغنية ليك، وكتبت عليها اسم ملحن تاني، وانت المفروض جوة الصناعة، اللي بينتجوا الأغاني بيسرقوا الأغاني والألحان، هل ده مش معناه إن الصناعة اتدمرت، هل وجود المهرجانات وصورتنا برة مصر واختفاء الناس الكويسة ده يرضيك".
وتابع "مش هعتب عليك إنك أخدت الأغنية بس انت مثل من الأمثلة اللي استباحت الجمل اللحنية لأشخاص موجودة وحية، مش هرد أكتر من كده".
آخر أعمال تامر عاشور
طرح الفنان تامر عاشور منذ أسبوعين أحدث أعماله الغنائية، والتي تحمل اسم "أصحى للكلام"، وذلك عبر قناته الرسمية بموقع الفيديوهات الشهير "يوتيوب".
وتعد أغنية "أصحى للكلام" أول أغاني الصيف الذي طرحها الفنان تامر عاشور، استعدادًا لطرح ألبوم الشتاء الذي من المقرر أن يكون جميع أغانيه درامية.
أغنية "أصحى للكلام" من ألحان محمد أنور، وكلمات محمد مصطفى ملك، توزيع محمد مجدي، جيتار مصطفى نصر، طبلة عيادي، اورج شاهي.
