" اتعالجت من السرطان وكنت عاملة جو جميل في المستشفى ".. أبرز تصريحات عايدة رياض

حلت الفنانة عايدة رياض، ضيفة في برنامج " واحد من الناس " مع الاعلامي عمرو الليثي،  المذاع على شاشة الحياة الفضائية،  وكشفت خلال لقاءها  عن تجربتها مع مرض السرطان. 

تجربة عايدة رياض مع مرض السرطان 

قالت عايدة رياض:" أنا اتفاجئت زي أي حد، كنت بعمل مسلسل دهشة مع أستاذ يحيى الفخراني وابتديت اتعب شوية، وروحت لدكتور وحللت وأخدت علاج، وكل دا معرفش فيه ايه، وبعد 3 أشهر روحت عملت آشعة، طلع سرطان في المثانة".

وتابعت: "إحساسي وقتها كان صدمة، وقعدت 3 أشهر اتعالج وفي أول شهر كنت مخضوضة، ومكنش فيه حد يعرف خالص غير أخويا، وبعد أول 3 جلسات عملتهم في المستشفى قالي لازم تشتغلي، وفعلا نزلت الشغل وركبت بروكة، ومقولتش خالص أني تعبانة".

شفاء عايدة رياض من السرطان 

واستكملت:" أنا إنسانة ضعيفة جدًا، وربنا هو أهم من كل حاجة، ودا اللي كنت بكلمه بس، وممكن لو قولت لحد يفتكر أني عايزة منه فلوس، واتعالجت، وكنت عملالهم جو جميل جدًا في المستشفى، وكنا بنهيص بليل، وبعد ما اتعالجت روحت لجراح قالي لازم تشيلي المثانة وتركبي مثانة صناعية، بس قررت أني مش هعمل العملية بعد استخارة، وبعدها أخويا جاله سرطان في الدم وبنته كانت 10 شهور، وكانت حالته أصعب مني بكتير".

آخر أعمال عايدة رياض

جدير بالذكر أن أخر أعمال عايدة رياض مسلسل ليه لأ 3 الذي تتناول حلقاته قضية اجتماعية هامة، أثارت جدلًا واسعًا بين الجمهور عقب طرحها في المسلسل، وهي أحقية السيدة المطلقة التي تعول أبناء كبار في الزواج مرة أخرى، وبناء أسرة جديدة، بالإضافة إلى قضية التفرقة في المعاملة بين الولد والبنت، وسوء تربية الأولاد وتدليلهم زيادة عن اللازم وتأثير ذلك على سلوكهم.

ويشارك في بطولة مسلسل ليه لأ الجزء الثالث عدد كبير من النجوم والنجمات، منهم: نيللي كريم، صلاح عبد الله، معتز هشام، عايدة رياض، أحمد طارق، نادين فاروق، سامية أسعد، أمير صلاح، حازم سمير، آلاء سنان، هديل حسن، فريدة رحب، وظهور خاص للإعلامية إنجي علي بدور “رانيا”، زوجة والد “ياسين” الذي يجسد دوره الفنان الشاب معتز هشام.