صلح رامي صبري وعمرو مصطفى على الهواء في "نجوم إف.أم" وعودة "يمكن خير"

انتهى الخلاف بين الفنان رامي صبري والملحن عمرو مصطفى بالصلح بين الطرفين بعد أزمة أغنية "يمكن خير" بعد أن قام الأخير بغلقها على يوتيوب، وجاءت المصالحة عبر إذاعة "نجوم إف.أم" وعلى الهواء مباشرة.

رامي صبري يتحدث عن عمرو مصطفى

وأثناء حلول عمرو مصطفى ضيفا على برنامج "أجمد 7 الساعة 7" عبر نجوم إف أم، قام رامي صبري بإجراء بمداخلة على الهواء وقال: "نفتخر بوجود عمرو مصطفى لكن مينفعش تختلف بطريقتك دي ومينفعش تطلع تقول إني سرقت منك الأغنية".

وأضاف رامي صبري: "انا دايما بدافع عنك يا عمرو وبقول انت أطيب واحد في الدنيا وانتوا فاهمينه غلط ولحد إمبارح مدافع عنك رغم أنك وقفت أغنيتي من اليوتيوب".

عمرو مصطفى يعتذر لـ رامي صبري على الهواء

وأعتذر عمرو مصطفى لرامي صبري قائلا: "اعتذرلك يا رامي لكن أنت المفروض تكتب أن أغنية (يمكن خير) لحن عمرو مصطفى ورامي صبري وأنا أكتر واحد بدافع عنك يا رامي وحصل خير ومتفرحش الناس فينا".

وتابع عمرو مصطفى: "مش هرفع قضية على رامي صبري والأغنية هترجعله وخلاص لأني بحبه وبحب كل الفنانين ولكن مينفعش يبوظوا هيبتي في المزيكا".

يذكر أن تم حذف أمس أغنية يمكن خير من على موقع الفيديوهات الشهير يوتيوب، وبعد ذلك خرج رامي صبري عن صمته لكي يوضح أن لحن أغنية يمكن خير تم طرحه عام 2019 وأنه ليس لـ عمرو مصطفى، ليرد عليه عمرو مصطفى أن اللحن معه من 1999.

كلمات أغنية يمكن خير 

ولا وقته اننا نتحاسب
ولا وقته إني ألوم ولا اعاتب إيه
إيه هيفيد على اد ما قلبي وجعني
وانا شايفك جاي تودعني وماشي ماشي بعيد

يمكن خير ومين يندم على اللي يبيع سنين
ويهد أحلامه في يومين ويبيع اوام
هنساك واعيش واهو حب راح وخلاص مفيش
لهواك مكان ميهمنيش خلص الكلام

ولا وقته اننا نتحاسب
ولا وقته إني ألوم ولا اعاتب إيه
إيه هيفيد على اد ما قلبي وجعني
وانا شايفك جاي تودعني وماشي ماشي بعيد

يمكن خير عشان كان لازم ابعد من زمان
انا وانت ميسعناش مكان والبركة فيك
موضوعنا مات مبقاش خلاص في معجزات
وبلاش نقلب في اللي فات راحت عليه
ولا وقته اننا نتحاسب
 

ولا وقته إني ألوم ولا اعاتب إيه
إيه هيفيد على اد ما قلبي وجعني
وانا شايفك جاي تودعني وماشي ماشي بعيد