مدين لـ "الفجر الفني": أغنية "فاكر نفسك هدية" لـ رامي صبري استغرق تحضيرها عامين (خاص)
حققت أغنية "فاكر نفسك هدية" للفنان رامي صبري نجاحًا كبيرًا في الفترة الأخيرة وهي كانت ضمن أغاني ألبوم "معايا هتبدع".
وتحدث المطرب والملحن "مدين" في تصريح خاص لـ "الفجر الفني" عن كواليس الأغنية وعن تعاونه مع رامي صبري، وتحدث أيضًا عن مَن مِن الفنانين يريد التعاون معاه مُجددًا.
وكشف مدين، لـ "الفجر الفني" كواليس العمل مع الفنان رامي صبري وعن كواليس أغنية "فاكر نفسك هدية" قائلًا: "رامي صبري فنان كبير وهو أخويا وحبيبي وأنا بحب الشغل معاه وحققنا نجاحات قبل كدة في أغنية "بقولك ايه تعالي"، "غريب الحب" فإحنا عاملين نجاحات كتير قبل كدة".
وتابع قائلًا: "مبسوط طبعًا برد فعل الناس على الأغاني الأخيرة مع رامي صبري وهما (حبينا، فاكر نفسك هدية)، وأغنية "عنها المركب" قعدت معانا سنتين أو سنة وشوية لحد ما نشوف لها شكل، لحد في النهاية ما طلعت في الشكل الحلو جدًا اللي عمله، الموزع جلال الحمداوي بصراحة وهو بردو موزع كبير وجميل، وعنده يعني أصوات بتاعته وشخصية مستقلة عن باقية الناس بيطلع صوت مختلف".
وأضاف: "الحمد لله حققت نجاح كويس وأغنية حبينا ده شكل الحب اللي أنا بحبه اصلًا في الأغاني اللي بعملها زي (حاجة مستخبية، وحبه جنة، وحبيبي أنت حبيبي لتامر عاشور) فالحمد لله أن الأغنيتين في الألبوم ده حققوا نجاح كويس الحمد لله".
وتحدث مدين عن مَنْ مِن الفنانين يريد تكرار العمل معاهم قائلًا: "من غير ما يكون رد دبلوماسي والله أنا فعلًا حابب أكرر التجربة تاني وتالت ورابع مع كل الناس اللي اشتغلت معاهم،وفي ناس اشتغلت معاهم في كذا ألبوم وحققنا نجاح في كل مرة أعلي من اللي قبلها ف الحمد لله ويارب إن شاء الله مكملين مع كل الناس بنفس مستوي النجاح وأكثر كمان".
وكشف مدين عن سر نجاح أغانيه مع الفنان تامر عاشور قائلًا: " تامر عاشور ده حبيب قلبي وعشرة العمر وكمان تامر بالذات أنا كل الاغاني اللي عاملها معاه أنا بحبها لأن كل الأغاني تقريبًا بكون عاملها ليا أنا الأول يعني ببقي أنا اللي هغنيها من أول أغنية هقدر".
وأضاف: "والحاجة الاساسية عندي في التفكير دائمًا أن في أغاني لـ تامر كل ما أحس أن أغنية أنا عايز أغنيها أنا أوي ممكن اسمعها ل تامر لأن وقتها ممكن أكون مش جاهز إنتاجيًا أو مأجل فكرة نزول الأغنية لوقت معين ومش بحب الأغاني تفضل معايا وخلاص وخاصة أني بلاقي أن تامر بيغني بنفس الإحساس اللي نفسي فيه ووصل الأغنية زي ما أنا عايز يعني ف أنا من حبي فيه وفي صوته وفي شخصيته، وهو أخويا وحبيب قلبي بديله الأغاني أول بأول".
