محمد رحيم لـ رامي صبري: أنا ساكت بقالي سنين ولم أتخذ الإجراءات القانونية

لا تزال تداعيات أزمة الفنان رامي صبري وعمرو مصطفى على أغنية “يمكن خير” مستمرة، وهو ما أدي إلى حذف الأغنية من موقع الأغاني الشهير "يوتيوب"، وتم بعدها الصلح بين رامي صبري وعمرو مصطفي عبر مداخلة هاتفية في قناة نجوم إف إم.

وتحدث رامي صبري خلال المكالمة الهاتفية عن الملحن محمد رحيم، متهمًا إياه بأنه دائمًا يحارب النجاح.

ورد رحيم،  على ما ذكره الفنان رامي صبري خلال المكالمة وذلك عبر صفحته الرسمية بموقع التواصل الإجتماعي "فيسبوك" حيث قام بنشر فيديو وعلق عليه قائلًا: "ردي على صديقي الفنان الكبير رامي صبري بعد اتهامه لي في وسائل الاعلام اني بهاجم النجاح مع كل الحب والتقدير، أولًا يعلم الله سبحانه وتعالى أني معنديش أدنى وقت أضيعه في اني ادخل في أي مواضيع نظرا لانشغالي بمجموعه أعمال مهمه جدا ان شاء الله الناس هتشوفها قربب".

وتابع: "ولكن تعليقا على مشكلتك انت وعمرو مصطفى اللى الحمد لله اتحلت في مداخله اذاعيه وربنا مايجيبش زعل أبدا بين الأخوات ولكن للأسف اللى حصل ان اسمي تم أقحامه من طرفك بشكل لايليق  ونظرا لأن المداخله كانت على اذاعه مشهوره فطبعا اتسمعت من بعض أفراد عائلتي ومنهم بنتي وأكيد  قطاع كبير من جمهوري اللى بيحبني وبيحترمني وبيحب اعمالى فوجب اني ارد عليك بكل حب واحترام علشان أوضح واصحح المغالطات اللى حصلت في المداخله انت قلت في المداخله بالنص انك سنه 2013 هاجمتني بنفسك علشان انا كنت (بحارب نجاح ) كان اخويا الفنان عمرو مصطفى حققه وقت ماقدم أغنيه بشره خير".

وأضاف: "وكأن انا راجل معنديش حاجه اعملها غير اني اهاجم واحارب الناس الناجحين وانت اللى وقفت في وشي !! وده طبعا كلام مغلوط ومسئ ولازم اصححه وأبين للناس الحقيقه اللى سكتت عنها سنين احتراما للعشره الطويله والصداقه اللى بتجمعنا كلنا اولا انا الحمد لله مش ناقص نجاح وتاريخ بفضل الله سبحانه وتعالى علشان اهاجم اي حد ناجح ربنا يعلم اني بدعي في صلاتي بالرزق والتوفيق لكل الناس وبتمنى الخير للجميع اللى حصل ساعتها اني علقت ان لحن بشره خير شبيه إلى حد التطابق ل عملين من اعمالى وهما اغنيه لاكده عاجبين للمطربه الصاعده ايمان سمير واغنيه كل ده يطلع منك للنجمه شيرين وجدي والأغنيتين صدروا سنه 
(2004) يعني قبل صدور لحن بشره خير ب 9 سنين على الأقل ونظرا لنجاح بشره خير وفرحتنا كلنا بيها انا قفلت الموضوع تماما ومرضيتش أبين للناس انا بقول كده ليه".

وتابع: " ولكن الفيديو اللى تحت ده هو الفيصل اللى هيبين للناس إذا كنت بخترع كلام من دماغي ولا كلامي فعلا صح بناء على علم ودراسه وخبره وانت طبعا راجل فاهم ودارس مزيكا برضه زينا، كما تم إرفاق لحنين آخرين من اعمالى وهما انا بحب عيونك للفنان عمرو دياب ومشاعر للفنانه شيرين عبد الوهاب واللى حصل اني لقيت نفس اللحنين دول تم استعمالهم في اغاني خاصه بيك وحققوا نجاح كبير معاك من غير ما تضع اسمي عليهم  على الاقل جنب اسمك وطبعا الفيديو هيوضح المسأله دي جدا حتى لغير المتخصصين وواثق ان الجمهور هيتفاجئ وفي ناس كتير هتستغرب انا ازاي سكتت طول السنين دي والاجابه لأني انسان مسالم ومحترم وعمري ما اسمح لنفسي ارفع قضيه على زميل وأخ ومؤمن بتوارد الخواطر وحسن النيه دائما وطبعا دي مش مني دعوه للتخلى عن الحقوق ولكن العشره الطيبه والمحبه والصداقه ليها علينا حق".

وأضاف قائلًا: "والخلاصه، أنك هاجمتني قبل كده أكتر من مره ومازلت لأني قلت كلمتين (فضفضه) هما من صميم حقي وقوانين الملكيه الفكريه واضحه ومفيهاش هزار في بلدنا وفي كل دول العالم وكنت بشوف مجهودي وتعبي بينسب لغيري وبستحمل وبسكت عشرات المرات وللأسف انت اللى زعلان وبتتهمني اني كنت بهاجم النجاح لأ انا قطعا مش بهاجم النجاح لأنني والحمد لله صديق النجاح انا فقط كنت بعلق على استحياء وخجل على ظاهره سلبيه جدا ومتكرره في أسلوب العمل في الوسط الفني  وهي ظاهره استغلال واستحلال مجهود الناس دون وجه حق ونسبته لغير أصحابه الحقيقيين وانا عايز بعد تجربتك الاخيره مع عمرو اللى سببت المشكله دي كلها الناس تحاول تتخيل انا ساكت على ايه بقالي سنين ولكن بعد الاعتداء على اعمالى وافكاري ومجهودي ثم سكوتي وصمتي اطلع بحارب النجاح كمان وكمان اطلع مش عاجب ؟؟؟".

واختتم حديثه قائلًا: "لأ طبعا ده كلام مرفوض تمامًا وفعلا انا مش هسمح لأي حد يقوله وربنا يسامح الجميع وطبعا انا برد على الملأ لأنه كلامك كان على الملأ فلذا وجب التصحيح والتوضيح مع تأكيدي ان عمرو مصطفى طبعا انا بعشقه وبحبه من قلبي وانت كمان اخويا وبحبك والدليل اني اول مره اتكلم على مواضيع زي دي حدثت منذ سنوات ولكن زي مانت عندك اسره وعندك جمهور تخاف على شكلك قدامهم انا كمان زيك بالظبط مع تمنياتي بالتوفيق والنجاح الكبير للجميع اخوك الموسيقار المصري العالمي المجتهد والمحترم والمحب محمد رحيم".