المرض جالي بسبب الحزن.. وتامر حسني بدري عليه لقب "نمبر وان".. أبرز تصريحات رامي جمال في "حبر سري"

حل الفنان رامي جمال، ضيف ببرنامج " حبر سري " مع الاعلامية أسما إبراهيم، المذاع على شاشة القاهرة والناس الفضائية،  وتحدث عن رفضه التلحين لمطربي المهرجانات وموقفه من تحريم الفن، كما كشف تفاصيل سبب إصابته بمرض البهاق ودور زوجته في حياته، لذلك نستعرض أبرز تصريحاته في السياق التالي. 

رامي جمال يكشف أبرز الأماكن الذي يرفض الغناء فيها 

وأكد الفنان رامي جمال، رفضه الغناء في أماكن فيها شرب خمور أو تشاركه راقصات، قائلا: "فكرة أني أغني في أماكن فيها شرب خمور برفض وعندي تحفظات على حاجات معينة وبرفض الرقاصات برضو ومتطلعش الرقاصة معايا في فقرتي في حفلة أو فرح".

وأوضح رامي جمال، أنه يفضل الاستحواذ على الاهتمامات لذلك لا يفضل وجود راقصات معه، مضيفا: "لو اتعمل لي مفاجأة بوجود راقصة في فرح همشي، والرقص فن في ناس بتحبه ولكن متطلعش معايا أنا شايف اخد الاهتمام لوحدي".

ما موقف رامي جمال من تحريم الفن ؟

ورد رامي جمال، على موقفه من تحريم الفن، قائلا: "أنا مش شيخ وأنا شايف كل الشغلات فيها الحلال والحرام وفي شبهات ممكن الواحد يتجنبها ومش عايز أحدد الشبهات عشان لو في زملاء بيعملوها، واللي يحلل ويحرم الشيوخ وشايف ان فني اقدمه لوحدي".

رفض رامى جمال تقديم ألحان لمطربي المهرجانات 

وأكد رامي جمال، أنه من المستحيل تقديم الحان لمطربي مهرجانات، قائلا: "مستحيل ألحن مهرجانات ومش ذوقي وأنا اتحاسب على اللي بعمله ومش عايز أقدم فن اعتذر عنه بعد كده في يوم من الأيام، حتى لو الدنيا جت عليا مش هغني مهرجانات واستعين بأهلي".

وأضاف أنه من نجوم الصف الأول في التلحين ولكن ما زال أمامه الكثير من الأحلام ليحققها، متابعا: "أنا من نجوم الصف الأول ومن وجهة نظر السوق والمتعهدين صف أول ومن وجهة نظري لسه كتير على اللي حلمت به".

واستكمل: "بالنسبة للأجر بأخد أجر أكثر من ناس كتير وبحب يكون ليا أجر مختلف ولسه نجاحات كتير، وعمرو دياب نموذج والنجاح سهل الوصول له إنما النجاح متغير والمهم الاستمرارية".

تفاصيل إصابة رامي جمال بمرض البهاق 

وكشف رامي جمال، تفاصيل سبب إصابته بمرض البهاق لأول مرة، قائلا: "المرض بالفعل جالي بسبب الحزن، والقصة بدأت أني في يوم سافرت أصور أغنية ليا مع مخرج وكانت تكلفتها ضخمة مبلغ 100 ألف دولار، وبعد انتهاء التصوير لقيت المخرج بيماطل في تسليم الكليب".

وأضاف أنه مع اصراره أخبره المخرج أن الهارد المسجل عليه كل تفاصيل الكليب اتكسر، متابعا: "كان ابتلاء كبير وحركة لو حد جديد ميقعش فيها وفكرت أنه ممكن يكون مقصودة ولكن طلع كلامه صح".

وأوضح رامي جمال، أن الواقع كنت في بداية مشواره الفني، قائلا: "راحت الفلوس وربنا كرمنا بالحل ولكن كان صعب وقتها، وبعد كده استشهد صديقي عمرو صلاح وحزنت جدا عليه لإنه صديق العمري وجالي بعدها السكر".
 

  
ما هي أبرز عيوب رامي جمال؟ 

وأضح أن أكثر عيب في شخصيته هو حبه الزائد للشغل مما يؤثر على حياته الشخصية، قائلا: "أكثر عيب في نفسي الشغلة بتاعتنا بتسرق العمر وكل شويه أقول هخلص البوم ونسافر وندخل في اللي بعده ومراتي ديما تقولي مش مهم نؤجل".

وقال إن النجاح والطموح يستحمله الفرد لأنه حلمه إنما شريك الحياة يتحمل لأنه يحب، مؤكدا أنه وقت كبير من حياته يكون مشغول ولكن مساحة مراته في حياته 100% حتى في الأوقات التي لا يكونون فيها مع بعضهم.

رسالة رامي جمال لزوجته 

ووجه رامي جمال، رسالة إلى زوجته قائلا: "أي حاجة زعلتها مني أنا مرضاش واحنا أولاد أصول ومتربين وبشكرها على كل الحب والدعم اللي شوفته منك، حتة في الوقت اللي مش موجودين فيه مع بعض بنتواصل في التليفون وبأخذ رأيها في كل شيء في حياتي".

رامي جمال يكشف أفضل المطربين في الساحة الفنية 

وأكد رامي جمال، أن الهضبة عمرو دياب هو النجم الأول بمقاييس السوق وطموحه في النجاح كبير، قائلا: "عمرو دياب نمبر وان بمقاييس السوق وتامر حسني فنان شاطر بس مش رقم واحد ولسه بدري على هذا اللقب وممكن نقول عليه نمبر وان بعد 40 سنة مع استمرار النجاح".

وأشار  إلى أنه من عشاق مدرسة محمد منير، مضيفا: "محمد منير بيقدم اللي عايزة وكلام أغانيه فلسفي ومزيكته مختلفه وبيعمل اللي هو عايزة وعمرو دياب محقق نجاح وغيرة فنية كبيرة".

وتابع: "بشكل عام الطموح العربي قليل وأغلب البشر طموحهم مرتبط بالفلوس وده الدليل أن عمرو دياب طموحه مش فلوس ولكن طموحه أنه شخصية فنية لا تكرر".