عمرو رمزي:" عادل إمام قالي انت جميل وشوفت حيلهم وبينهم وحرمت يا بابا وهتبقى معانا في مسلسل فرقة ناجي عطا الله"

حل الفنان عمرو رمزي، ضيف على برنامج “ الستات مايعرفوش يكدبوا ” المذاع على شاشة cbc الفضائية، تقديم الإعلاميتين منى عبد الغني ومها الصغير، وتحدث عن كواليس أول لقاء بينه وبين الزعيم عادل إمام، وتعاونهما في مسلسل “ فرقة ناجي عطا الله ”، نستعرض أبرز تصريحاته في السياق التالي.

كيف كان كواليس أول لقاء بين عمرو رمزي والزعيم عادل إمام؟ 

كشف الفنان عمرو رمزي، كواليس أول لقاء جمعه بالزعيم عادل إمام، والتحاقه بمسلسل فرقة ناجي عطا الله بعد برنامجه الشهير حيلهم بينهم، قائلا: "أول مرة كلمته انا متكلمتش هو اللى اتكلم، لقيت رامي إمام بيقولي سيب اللي في إيدك وخد فأعطي التليفون للزعيم فقال لي انت جميل وشوفت حيلهم وبينهم وحرمت يا بابا، وهتبقى معانا في مسلسل فرقة ناجي عطا الله، وبس".

كواليس تعاقد عمرو رمزي على مسلسل فرقة ناجي عطا الله 

وأضاف عمرو  رمزي:" كانت فرصة عمري ان الزعيم عادل إمام يكلمني، وفي اليوم ده منمتش وفضلت ساكت لحد لما رامي إمام خد منه السماعة فقال لي تمام يا عم فقلت له إيه اللي تمام ياعم، فقال لي الأستاذ اللي كلمك فقلت له طيب اديهولي تاني اكلمه فرد مش فاضيين نشوفك في المسلسل، فقلت له طيب أجيلكم البيت قاللي الساعة 12 بالليل هتيجي فين؟ هنشوفك بكرة الساعة 11 في الشركة، ولما روحت الشركة كنت قاعد بدردش انا ورامي فدخل الأستاذ مقالش حتى السلام عليكم فأنا قلت اكيد اتشلت من الدور وقفل مني ورامي كان بيهزر".

كيف كان موقف عادل إمام من انضمام عمرو رمزي لمسلسل فرقة  ناجي عطا الله؟ 

وتابع: "قلت لرامي إمام امشي خلاص بقى الزعيم حتى مقالش السلام عليكم لينا وهو ماشي من قدامنا، فقال لي يا عم اصبر بس هو مشغول شوية، فقعدت شربت قهوة وبعدين دخلنا علي أوضة البروفة فالزعيم كان قاعد علي الترابيزة بيكلم حد فقلت له مساء الخير مردش عليا، فقلت لرامي فيه إيه قال لي اسكت، فضلت قاعد ساكت، فالزعيم مرة واحدة قال لي انت مين؟ وقتها اتخضيت خضة جامدة ومبقتش عارف أقول ايه، وبعدين قلت له رامي اللى قاللي اجي،فرامي قال له يا أستاذ معلش هديله حاجة كده ويمشي، فأنا قلت هيديني حسنة يعني ولا إيه، فقلت له طيب يا استاذ اسيبك علشان واضح إنك مشغول، فقال لي لأ اقعد بطريقته، إيه بقى اللي جابك هنا يا عمرو، فقلت له رامي قال لي احنا بنعمل مسلسل فرقة ناجي عطا الله، ولو بتعملوا المسلسل عمومًا مبروك، فقال لي مبروك علي إيه يا حبيبي، فرد أما نشوف إيه اللى جابك هنا وقام برة وراح باصص عليا من الباب وراح قافل الباب، كنت عايز انط من الشباك، ولكن في النهاية وافق عليا".