انتصار لـ الرجال: "اوعى تعزم البنت على العشاء في المقابلة الأول يمكن متعجبكش ومتحبش ريحتها"

كشفت الفنانة انتصار عن عدد من الخطوات التي يجب على الرجل والمرأة اتباعها خلال المقابلة الأولى للتعرف، كما وجهت رسالة للفتيات.

وقالت انتصار، في مقدمة برنامجها “من غير نفسنة” الذي تقدمه مع الفنانة بدرية طلبة ونوليا، عبر شاشة قناة “هي”: اللقاء الأول ده يا إما هنكمل مع بعض يا إما مش هنكمل القاعدة مش العلاقة، وأوعوا تقابلوا بعض وتقولوا عشاء أو غداء، وأنت إياك تعزمها على غداء أو عشاء، لأ تقولوا هنشرب حاجة مع بعض، علشان لو أنت قعدت معاها واتضايقت من حاجة زي مثلًا نبرة صوتها تفاهتها أو ريحتها، متبدسش في 6 ساعات، لكن هتشرب حاجة في نص ساعة وتقولها هشوفك بقى وتليفونات، ده لو أنت اتخنتق نتيجة غباوتها وعينك مش طايقة تشوفها.

وتابعت: لو عجبتك قولها طيب تحبي نتعشى؟ ولو هو اللي مش عاجب البنت ترفض أنها تتعشى وتشرب حاجة وتمشي، ولو عجب البنت تقوله أنا عزماك على الغداء، وتلزيق المحبين ده.

وأضافت: لو إنتي رغاية بطبعك وبتحبي تتكلمي في كل حاجة وسيرة أهلك، مش لازم تعملي كل ده في أول أو تاني لقاء، ومش لازم تحكي فركشتي مع مين قبل كده ومين اللي جه البيت واتقدم، على فكرة هو مش جاي يعمل كشف هيئة، الراجل لسة بيشوف روحك.

‎
 

انتصار: "المروجين للسنجلة ضد الستات.. وضحكوا علينا وقالوا اشتغلوا وخدنا مكان الرجالة وبقى عندهم بطالة"

قالت الفنانة انتصار، أن الرجال يعانون من البطالة بسبب خروج المرأة للعمل، موضحة قلة الإقدام على الزواج هذه الأيام تعود للحالة المادية للرجل.

وأضافت انتصار: "السنجلة علشان تداري الألم والوجع اللي حصلها من الانفصال، في رجالة كتير حلوة بس مفيش جواز لأن البنات خرجت تشتغل فالرجالة قعدت على القهاوي، هيتجوزوا منين ما إنتوا خدتوا مكانهم، فأنا رأيي انسحبوا من سوق العمل وسيبوهم هما يشتغلوا. 

وتابعت: البنات ساعات بتلجأ أنها تقول أنا سينجل من باب أنه مجاش حد، فبدؤا يروجوا لفكرة السينجل علشان متقولوش أنها معنسة أو متأخر الجواز، أو مطلقة ومجاش لها عريس عايز يتجوز تاني، دي تقيلة برضو، وكل ما يبروز أنها غير مرغوب فيها فتقول إنها سينجل مع إنها نفسها تتجوز ويكون لها بيت وأسرة.

واستكملت: الحياة مش حب وبس، الحياة اتنين بيساعدوا بعض، وبيحلموا مع بعض وبيفوتوا لبعض، وبيحطوا إيديهم في إيد بعض علشان يواجهوا الدنيا، والمروجين للسنجلة ضدكم وضد كل الستات، وضحكوا علينا وقالوا لينا اشتغلوا عشان نشتغل فالرجالة تضايق، وخدنا مكانهم والرجالة بقى عندها بطالة، وأنا بقول الكلام ده على مسؤوليتي.

وأوضحت: ضحكوا علينا وبقينا سناجل، 40 سنة وسينجل؟ يعني هتعملي إيه هتكمليها سينجل؟، مترضيش بضغوط من أي راجل في الدنيا وخليكي واثقة من نفسك.

انتصار تتحدث عن اهتمام الإعلام بفئة معينة

أعربت الفنانة انتصار، عن استيائها بسبب تسليط الضوء على الأشخاص الذين يريدون تصدر تريند مواقع التواصل الاجتماعي بطرق غريبة كالغناء من دون موهبة، والطبخ في غرفة النوم، وعدم تلسيط الضوء على المخترعين وأوائل الجمهورية.

وقالت انتصار: "أوعوا تفتكروا أن التريند ده وليد اللحظة، علشان محدش يفتكر أنه مخترع التريند، هو زمان لما كان في أغنية بتفرقع وتكسر الدنيا في جميع أنحاء الجمهورية هو ده التريند الحقيقي، ولكن مكناش نعرف اسم تريند، زي مثلًا أغنية لولاكي، ده نسبة التوزيع بتاعها موجود في موسوعة جينيس كعدد أرقام، هي من أعلى الأغاني اللي اتوزعت شرايطها والناس غنتها.

وتابعت: لما البرامج بتنجم اللي معملش حاجة، اللي عمل حاجة بجد بيزعل، لأن ده حظه ووقته واللي المفروض الناس تهتم بيه علشان ياخد طاقة ويكمل، يعني نسيب الأوائل على الإعدادية والعلم والمعرفة والمخترعين، وعمالين نمسك في اللي بيطبخوا على النت واللي بيدور على بومة تحت العربية.

من غير نفسنة” برنامج نسائي ساخر يقدمه كلا من الفنانة انتصار وبدرية طلبة ونوليا،  يعرض يوميًا من السبت إلى الثلاثاء، ويقدم عددًا من القضايا الاجتماعية بطريقته الساخرة والخاصة من خلال استضافة عددًا من الشخصيات المؤثرة على السوشيال ميديا والمشاهير والفنانين لمعرفة آرائهم في تلك القضايا.