نيقولا معوض يكشف عن أسباب اعتذاره عن فيلم"أصحاب ولا أعز"
أعرب الفنان نيقولا معوض عن حزنه الشديد لعدم مشاركتة في فيلم أصحاب ولا أعز والذي يعرض حاليًا.
حيث نشر الفنان نيقولا معوض عبر حسابه الرسمي على موقع التواصل الإجتماعي "فيسبوك" منشورًا وكتب عليه قائلًا: "يلّي متابعني منيح، بيعرف إني بحياتي ما اعتذرت عن دور، وبعدين طلعت قلت (هيدا الدور كان إلي).. مع إني ما بلاقيها غلط، بالعكس بلاقيها شغلة كتير عادية، وما فيها أي انتقاص لا من الدور ولا من الممثل يلّي أخد الدور.
وأضاف:"بَسّ اليوم، مع كل الجدل يلّي عم نشوفوا حول فيلم (أصحاب ولا أعزّ)، كتير حابِب قول إني كان المفروض أكون واحد من مُمَثّلي الفيلم.. وكمان حابب قول إن سبب اعتذاري ما إلو علاقة أبدًا بالجَدَل الجاهِل العَقيم يلّي عم نشوفوا حاليًّا".
وواصل كلامه قائلًا:"اعتذرت لأنه ظروف كورونا خلّت التصوير يتأجَّل أكتر من مرّة، وكان عندي ارتباط مُسبَق بتصوير خارج لبنان، فا اضطرّيت انسحب من المشروع، وأنا عارف مُسبَقًا أني كتير رح إزعَل لمّا شوف الفيلم".
وتابع:" كنت مفكّر حالي رح إزعَل بَسّ لأنه الفيلم فنيًّا كتير حلو، كمان لأنّي كنت عارف مُسبقًا كيف رح يكون أداء كل إنسان اشتغل قدّام الكاميرا وورا الكاميرا، تحت إدارة المخرج يلّي بحبّه كتير وِسام سمَيرة.. بَسّ اليوم، لقيت حالي زعلان لأسباب تانية.. زعلان لأنه هالفيلم كان رح يكون فرصة تخلّيني أقول بالفعل مش بَسّ بالحَكي قدّيه الفَنّ أعلى وأسمى من كل القيود والأحكام والرقابات، وقدّيه للأسف نحنا عايشين بمُجتمع منافق مُزدوِج المعايير.. تحيّة من القلب لكل حدا اشتغل على هالفيلم، ولكلّ إنسان مؤمِن بِفَنّ حرّ ومُستقِلّ".
واختتم قائلًا: "بعرِف رح يكون في كتير تعليقات سلبيّة.. كان في ضَلّ ساكِت، بَسّ يلّي عم يتهاجَموا اليوم، هنّي زُمَلاء وأصدقاء بحتِرِمُهن، وكتير بحترم مشاركتُن بهالعمل، وواجِب عليّ وعلى كل إنسان بفَكِّر متلنا، أنه يوقف بصَفُّن.
