أول تعليق من الموزع إلهامي دهيمة بعد اتهامات عمرو مصطفى

أغضبت تصريحات الملحن والمطرب عمرو مصطفى، صُناع الموسيقى، وكان من ضمنهم الموزع الموسيقي إلهامي دهيمة، والذي ذكر اسمه ضمن حديثه واتهمه بالفشل، خلال استضافته في برنامج "حبر سري".

وكتب إلهامي دهيمة، عبر صفحته على موقع التواصل الاجتماعي "فيس بوك": "إلي الملحن عمرو مصطفي.. طول عمري بحاول أتعامل معاك ك فنان وأتجنب مشاكل شخصيتك ومؤامراتك الخفية اللي بتعملها مع نفسك ولكن.. لو قررت تتكلم وتقحم إسمي ف جملة مفيدة وف برنامج عالهوا وتضلل وتقول كلام محصلش ف تعالا انا أقولك الحقيقة لأنك كذبت كتير ف كلامك وكلامي في ناس كتير جوا الوسط وبرا الوسط تشهد عليه".

وأضاف: "أولًا انا متجوزتش لمعلوماتك والشغل عندك مجوزنيش ثانيًا انت لا اكتشفتني ولا عمري قولتلك والنبي شغلني ولا إعملي بالعكس.. انت اللي عجبك شغلي من وانا طفل كنت شغال ف شركة اسمها sense بتاعة محمد يونس المخرج وجيت اديتني جايد لأغاني وكلها شافت النور زي مصر تحيا لأحمد جمال ويا مصر متخافيش لهاني شاكر يعني مفشلتلش زي مانت قولت، ثالثا لما انا كنت شغال ف الراديو كلمتني وقولتلي تعالا انا عملت مكتب ف مدينة نصر وتوكلنا علي الله واشتغلنا".

"تعالا بقا افكرك بالأغاني اللي عملناها سوا ف ال ٩ شهور اللي قعدتهم معاك ف مكتبك وبتقول انهم منجحوش لتقصير مني انا وزمايلي وضعفنا ف اختيار الأصوات أو الكواليتي".

-أمي يا نور بيتنا - (اغنية لفت مصر ونجحت ف عيد الأم وناجحة لحد الآن واتغنت ف كل مدارس مصر وكل أطفال مصر غنوها وجايبة ٣٦ مليون مشاهدة يوتيوب فقط

-أكثر شخص بالدنيا - راشد الماجد جايبه ٧٢ مليون مشاهدة واتوزعت ف ساعة واحدة وبأقل مجهود

- شبعنا من التمثيل فضل شاكر وعودة فضل شاكر للغناء وتوزيع الأغنية اتعمل ومكساج وتسجيل وتريات وكل شيء تم في وقت قياسي وافكرك انك بكيت بالدموع لما سمعتها اول ما خلصت ف المكتب".

وتابع: "اتفائلوا بالخير ياسمين علي - ٣٩ مليون مشاهدة على يوتيوب فقط

اليسا عشت وشوفت ١١ مليون مشاهدة

تقدر - لؤي تتر مسلسل ربع رومي، وغيرها".

وأستطرد:" كلمتني قولتلي انقذني.. نوال الزغبي جايه من المطار عالمكتب وعايزة هيد للألبوم ومعاك تيمة عالموبايل اديتهالي.. لما نوال وصلت المكتب كان في شكل عملته تسمعه وغنت جايد كمان ومشيت مبسوطة وكله تمام، اغنية (كده باي) لنوال الزغبي، واغنية (جوا قلبه)، مع العلم يا عمرو إنه ف الوقت اللي كنت شغال فيه عندك ده.. كنت شغال برا برضو وناجح الحمد لله بدليل اغنية زي قولوله سماح لتامر عاشور.. اعتقد إنه نجاحها مش محتاج أشرحهولك ولو مش شايفه محتاج اعادة نظر، كل الأغاني اللي كتبتها دي فيها مجهود كبير مني ومن زمايلي أمين نبيل وأحمد الموجي، يمكن انا محضرتش فترة أحمد الموجي ف مكتبك ولكن الراجل ده عامل معاك اغنية مهمة زي طوبة فوق طوبة مثلا.. متقدرش تنكر نجاحها ومتقدرش تنكر مجهوده".

واستكمل:"انا حاولت احترمك كتير واتعامل معاك بتربيتي واحترامي لنفسي قبل ليك. وبشياكة وبرقي ولكن انت كده فتحت علي نفسك فتحة ملهاش آخر لأن كلنا بتعرف نتكلم.. انت بتكره النجاح للغير.. بتكره أي حد حواليك ممكن ينجح وده اللي مخليك مش علي بعضك الأيام دي لأنه السجادة اتسحبت من تحتيك ولكنها أرزاق الله يا عمرو.. اشتغل علي نفسك وطور من شخصيتك قبل ما تطور من مزيكتك.. لأنها بتنعكس عالمزيكا فعلا وانت شخصيتك باينة ف مزيكتك عشان كده مبقتش بتنجح.. وهفكرك بأغنية ٣ دقات اللي كانت مش بتخليك تنام الليل عشان بس اغنية نجحت وضربت".

بينما اختتم حديثه:"الناس اللي مشيت من عندك يا عمرو حياتهم ماشية عادي جدا وبيشتغلوا وبينجحوا عادي كل حاجة برزقها مش انت مقياس النجاح.. ولو انت كان عندك شقة عاملها مكتب..ف ربنا دلوقتي كرمني وعندي شركة انتاج صوتي ومرئي واستوديو حقيقي مش شقة.. بيخرج منه اعمال لأهم مطربين ف الوطن العربي".