رامي جمال عن دعمه للمطرب النقاش: أنا بسدد فيه ديون ناس ساعدتني

تحدث الفنان رامي جمال، عن سبب دعمه للمطرب النقاش أحمد سالم، مُشيرًا إلى أن صوته مميز، وقد أجبر العالم العربي كله على احترامه، وأنه لم يدعمه من أجل التريند كما اعتقد البعض.

رامي جمال : أحمد سالم فنان صوته أجبر كل العالم العربي إنه يحترمه

وتابع رامي جمال، خلال لقائه في برنامج "سهرانين"، مع الفنان أمير كرارة، مُضيفًا:"أحمد سالم فنان صوته أجبر كل العالم العربي إنه يحترمه، وفكرة دعمي ليه أنا استُفزيت للصوت، علشان فيه ناس بتقول دعمي لأحمد ليه سبب، ولكن أنا لما دعمته مكانش لسه حد يعرف الفيديو، وفيه ناس كتبت إني عايز أركب تريند، طيب اللي بيركب تريند بياخد حاجة نجحت أصلًا وبيتكلم عنها، لكن في وقت ما أنا نشرت الفيديو بتاع أحمد مكانش حد شاف الفيديو".

رامي جمال عن دعمه للمطرب النقاش :قُلت لـ مراتي ساعتها الصوت ده حرام لو معملتلوش حاجة

وأكد رامي جمال، على أن أحمد سالم له قبول كبير لدى الجمهور، وأنه قرر أن يقف بجانبه ويساعده لكي يسدد ديون الأشخاص التي ساعدته في مشواره الفني، مُضيفًا:" أنا قُلت لـ مراتي ساعتها الصوت ده حرام لو معملتلوش حاجة، فقالتلي يعني براحتك بس حاول تتحكم في حماسك، قُلت بالعكس ده اللي زيه لازم أكون متحمس ليه، أصل الفنان إيه غير صوت وقبول؟ والقبول واضح من ساعة ما الفيديو نزل إن سبحان الله كمية الناس اللي شاركت الفيديو وقالوا صوته حلو، والصوت مفيش عليه نقاش، وهو الولد متوفر فيه الاتنين، فأنا هبقى غلطان لو مخدتش الدور ده في حياتي".

رامي جمال : دورنا في الحياة مش بس إنك توصل

وأضاف رامي جمال:" أنا بسدد في أحمد ديون ناس عملتهالي وساعدتني، ودورنا في الحياة مش بس إنك توصل، ولكن فيه حد في طريقك ينفع تساعده وتوصله هو مش هياخد من رزقك حاجة، وده اللي هعمله مع أحمد إن شاء الله".

وتحدث رامي جمال، عن تفاصيل لقائه بالمطرب أحمد سالم، مُشيرًا إلى أنه أخبره حينها أنه سيقوم بعمل أغنيتين له، وأنه لن يجعله يمضي على عقود احتكار، قائلًا:" أنا قُلت لأحمد أول ما قعدت أنا هعملك أغنيتين واحدة أنا وأنت وواحدة لوحدك، ومش همضيك عقد احتكار، مع إني هصرف على الأغنيتين مبلغ كبير جدًا، بس أنا بصرفهم وهما اتصرفوا عليا قبل كده، وأنا بسدد فيك دين عليا، ولو ربنا كتب قبول في الأغنيتين دول يبقى دي رسالة من ربنا إني أكملك لو أنت اختارت إنك تكمل معايا".

رامي جمال عن أحمد سالم: طيبته مخلياه مصدقني

وأشار رامي جمال على أن أحمد سالم قد تلقى عروض احتكار كثيرة، مُضيفًا:" من دلوقتي الشركات عارضة عليه، ولكن هو فكر إني دلوقتي واحد من غير عقد وبعمله الأغاني بحب، ولقى الباقي كله عقود، وطيبته مخلياه مصدقني مقرر إنه يسيب نفسه في الأغنيتين اللي هعملهم ليه، وأنا بشيل هم فكرة إنك تدوق النجاح، وأحمد راجل وشقيان".

واختتم حديثه قائلًا:"سألت أحمد لو منجحناش هتعرف ترجع تشتغل تاني ولا لأ؟ أنا أقدر أشيل أحمد وأحط نفسي مكانه وأشيله لفترة، يعني لو قُلت إني هعمل الأغنيتين دول في 4 أو 5 شهور، وطول الفترة دي مصاريفك مسؤولة مني، بس لو منجحتش هتعرف تشتغل تاني؟ لقيت إجابته إجابة راجل شقيان، وقالي هرجع أشتغل عادي جدًا، ولحد ما أحمد يقف على رجليه أنا في ضهره".