ياسمين عز: 'عمري ما دخلت عيادة تجميل ومحدش هيصدقني'

تعرضت الإعلامية ياسمين عز لموجة من الانتقادات بعد نصائحها الأخيرة للمرأة في برنامجها "كلام الناس" المذاع عبر قناة MBC مصر إلى السكينة والتقدير بين الزوجين، ومنها عدم مطالبة زوجها بخلع حذائه قبل المشي على السجادة في البيت لأنه اشتراها بماله، ووصلت الانتقادات إلى التنمر علي مظهرها، اتهامها البعض بقيامها بعمليات تجميل. 

‏
وخرجت ياسمين عز عن صمتها وردت علي هذة الانتقادات، قائلة: "عمري ما دخلت عيادة تجميل، ولو حلفت من النهاردة لبكرة ما حدش هيصدقني، بس خلاص غسلت إيدي منهم، مع إني شايفة إن من حق الست تعمل تجميل لما تحتاجه، لأن الست بحكم السن بتوصل لمرحلة معينة وتحتاج دا، ومش بنظّر على حد".

ياسمين عز: بنام وضميري مرتاح وفي حالة سكينة

وقالت ياسمين عز خلال تقديمها حلقة اليوم من البرنامج: "الحمد والشكر لله بنام وضميري مرتاح وفي حالة سكينة، لإني بدعو للسكينة والتقدير والمودة والاحترام، وإن البيت يفضل عامر بيكم"، اضافت: "عمري ما هنام وأنا شايلة ذنب إني سخنتك وقومتك على جوزك وخربت بيتك بكلامي وأنا عايشة حياتي بالطول والعرض، ويا رب بيوتكم كلها تكون عمرانة بالحب، ويرزق كل راجل بست تستحمله وتشيله في عينيها".

ياسمين عز تنصح الفتيات

ووجهت ياسمين رسالة إلى الفتيات، قائلة: "عايزة أقول حاجة للبنات الصغيرة اللي بتتفرج علينا وشايفة إننا واخدين كل حاجة شغل وفلوس وشهرة، وفوق كل ده بنمشي الرجالة زي ما إحنا عايزين. ده مش حقيقي، إحنا في بيوتنا زيك بالظبط، بنقول حاضر ونعم بالأصول زي ما شوفنا أهلنا بيتعاملوا مع بعض".

ياسمين عز: البعض ساب جوهر ومحور الموضوع

كما انتقدت الإعلامية ياسمين عز تركيز البعض على أجزاء معينة من تصريحاتها الأخيرة في برنامجها "كلام الناس" المذاع عبر قناة MBC مصر، دون محاولة مشاهدة الحلقة كاملة وفهم هدفها من تلك التصريحات، والشريحة المحددة من النساء التي وجهت نصائحها لها، علقت: "البعض ساب جوهر ومحور الموضوع، والكلام الكبير اللي قولناه مع ضيوفنا المحترمين الأسبوع اللي فات، ومسكوا في جملة الفرخة والجزمة والسجادة، وفين أيام ما كانت الست بتدي جوزها الحتة الكبيرة من الفرخة".

وأضافت: "علي سيرة الفرخة، النهاردة قريت حكمة صينية بتقول البيت الذي تمارس فيه الدجاجة عمل الديك مصيره الخراب، يعني الست تكتفي بكونها جميلة وأنثى وتدير منطقتها. هو ما ينفعش تكوني ناعمة وأنثى وفي نفس الوقت قوية؟ لأ أنا أكون ناعمة وأنثى بكل المقاييس ومستسلمة تماما، لكن شخصيتي قوية وأعرف أقول لأ إذا عندي حق أقولها، مش أناطح".

وتابعت: "قلت بدل المرة عشرة إني ضد مبدأ التعميم، وكلامي موجه للستات القادرة المفترية، وواضح إن اللي ركز في الفرخة كان جعان، والناس ركزت مع الجزمة والسجادة وسابوا باقي الكلام، أومال لو قلتلك مينفعش تقولي لجوزك خد كيس الزبالة معاك وإنت نازل هتعملي إيه!"، اختتمت: "أبوكي وهو نازل عمرك ما هتقوليله خد كيس الزبالة وهو نازل، الفرخة مش موضوعنا وبلاش تدخلوني في تفاصيل عشان هروح معاكم".