بعد تصدرها التريند.. رأي صادم من سلوى خطاب بشأن الإنجاب!

كشفت الفنانة سلوى خطاب أسباب عدم رغبتها في الإنجاب، وذلك أثناء استضافتها في برنامج "كلام الناس"، الذي تقدمة الإعلامية ياسمين عز، المذاع على شاشة قناة "إم بي سي مصر".

وقالت سلوى خطاب: "ده قدر من عند ربنا، بس يمكن ربنا عارف حالتي، أنا مفهمش يعني إيه أجيب أطفال ومتحملش مسئوليتهم، أجيب أطفال يبقى لازم أتفرغ لهم، أنا هربي، طب ربيت كويس قوي، ده هيتطلب أنسى شغلي، وأنا كنت خلاص استهلكت في الجواز، من كتر ما أنا متفرغة للجواز، وبعدين أتجوز تاني وأخلف تاني، لأ، طب ما اعتزل أحسن، مكانش عجبني قوي، كنت حاسه كده، إن المجتمع ده لو خلفت فيه أنا هتعب، لإن فيه حاجات كتير مش عجباني".

سلوي خطاب: وأنا مش فاهمة يعني إيه تربية حديثة؟

وتابعت: "وأنا مش فاهمة يعني إيه تربية حديثة؟، وأجيب عيال يقعدوا يقرفوني، يقولولي لأ، نعمل كذا، شنطة هدومك يا حبيبي، شنطة هدومك يا حبيبتي، روحي يا حبيبتي المكان اللي انت عايزاه، وأخلص، أنا أجيب ناس تتعبني ليه؟، فالتربية الحديثة والجو ده مش بتاعي، مليش دعوه أنا يروحوا فين؟، أنا هشيل همهم، خلاص أنا مش عايزه، هوجههم كمان يروحوا فين؟، يروحوا مطرح ما هم عايزين، يعني عندهم لجوء سياسي يروحوا أي دولة، الحمد لله كان زماني متجرجرة في الأقسام، العيال عاملين فيا محضر، أمي ضربتني بالطفاية، ومش مليش خلق، هم مش هيفهموا مصلحتهم، إذا كنت أنا مفهمتش، فما بالك عيالي، صعب، الله يكون في عون الآباء".

سلوى خطاب: معنديش نقطة ضعف

وأضافت: "معنديش نقطة ضعف، الولاد نقطة ضعف، الحنية دي هيبقى قدامها حزم قوي، وبعدين هربيهم كويس قوي، يطلعوا بعد كده للمجتمع، يسمعوا أنتش وأجري، يعني هعمل إيه طيب، مش يبقى فيه تواصل".

آخر أعمال سلوي خطاب

ومن ناحية أخري شاركت الفنانة سلوي الخطاب مؤخرا في مسلسل "منورة بأهلها" الذي يدور حول اكتشاف جثة لشاب مجهول الهوية مقتولا فى إحدى الشقق، ليبدأ وكيل النائب العام "آدم" التحقيق فى ملابسات الجريمة التى سرعان ما تكشف عن أحداث مريبة وغامضة يمتزج فيها الواقع بالخيال.