خاص.. سامح يسري يكشف لـ "الفجر الفني" عن رأيه في أغاني المهرجانات ويعلن عن أعماله المرتقبة

كشف الفنان سامح يسري، عن رأيه في أغاني المهرجانات والتريند، كما أوضح امكانية تعاونه مع شعراء جُدد، وكذلك أعلن عن أعماله المرتقبة.

وقال سامح يسري لـ “الفجر الفني”:  "أنا بعتبر أغاني المهرجانات لون من ألوان الأغاني الراقصة المميزة الخفيفة.. والناس التفت حولها.. كما أني بعتبر الكويس فيها فعلا كويس.. والوحش فيها بيسئ لنفسه واللون الجديد اللي أصحاب النوع د من الفن عايزين يوصلوه.. فالمسألة مش مسألة استسهال خالص".

رأيه في تريند “أنتس وأجري”

وكشف رأيه في تريند "أنتش وأجري" قائلًا: "كلمة التريند ده معناه أنك تسمع نصائح أو فضائح فالمسألة مش تسمع فضائح بس عشان تكون مشهور وتبقى موجود، لأنه عمر التفاهة والرخص ما هتعليك حتي لو في أغنية لطيفة راقصة كلنا بنلتف حواليها من غير اي كلام".

وتابع حديثه قائلًا: “يعني الأغنية الحلوة الراقصة كلنا بنكون محتاجينها جدًا جدًا كونك بقى تعملها تريند عشان تشتم وتعمل نوع من الإسفاف وقلة الأدب هذا مرفوض.. لكن كل جميل بياخذ لك البهجة، ليه لا أنا مع ده جدًا وبقول للناس هي مسألة ثقافة ووعي.. اختار كلمة لطيفة وإيقاع لطيف ومتقعدش تعمل مسميات عشان تنطلق وتتشهر وتكون فاكر أن الشهرة كل حاجة” 

الاحترام اهم مقاييس الشهرة 

وأكد: "الشهرة لها مقاييس والشهرة لازم تكون باحترام، لأن أجمل كلمة ممكن تسمعها في اي مجال في كل حته في العالم انك تكون فنان محترم.. والكلمة دي مقدرش اعلمها لكل الناس لكن اقدر انصح بيها كل الناس".

وأضاف: "انك تبقي تريند ده هيكون من خلال الناس لما تضيفك في مكان مميز ومهم.. لأن ممكن مثلًا تكون سليط اللسان وتبقي موجود فعلًا واسمك تريند لكن هل ده هيعمل مكانة حقيقة جوه قلوب الناس، لا طبعًا بالعكس هتلاقي اسمك مكتوب عليه أسوأ مما تتخيل ومكانتك جوه القلوب أسوأ مما تتخيل".

إمكانية تعاونه مع شعراء وملحنين جُدد 
 

أما عن تعاونه مع شعراء وملحنين جُدد تابع حديثه قائلًا: "بالنسبالي الأغاني الحلوة بتفرض نفسها وأنا بتشرف جدًا اني أتعامل مع كل الجداد وبحترم جدًا اخواتي وعشرة عمري القدام انا برحب بأي حد جايب فكرة جديدة لكن تبقي افكار مناسبة وتناسب وقتك وتفكيرك ولونك مع التوزيع الجديد اللي يناسب لغة العصر، التعاون مفتوح للكل واهلا بالجميع بالعكس أنا ليا الشرف اني اتعاون مع كل الناس الجديدة بس بحب في الأول نقعد مع بعض لأن أنا مؤمن أن الصداقة أهم بكتير من البضاعة وإننا يكون همنا بس السلعة، لأن الصداقة والإخوة والقرب بتخلق جو فني مميز مختلف.. مش بسطحية يلا بينا نعمل أغنية".

أعماله الجديدة

وكشف سامح يسري لـ "الفجر الفني" عن أعماله الجديدة قائلًا: "عامل أغاني كثيرة في منهم باللون الشعبي وفي أغنية اسمها (يا سيدي قول)، وفي أغنية أسمها (حبيبي) وأغنية اسمها (والله انا بطل)، وأغنية اسمها (اوعي)، وكلها اغاني بالنسبالي شكل جديد ومختلف".

وتابع قائلًا: "الفترة الجاية عامل مفاجأة مختلفة أن شاء الله تعجبكم، وكمان جولة أوروبا الأخيرة كانت مميزة وأسفر عنها أعمال جديدة مختلفة منهم اتفقت مع المركز الفرنسي أن نعمل أعمال مختلفة سواء سينمائية وفنية وغنائية وفي كمان كذا ديو، ومسرح وسينما مع نجوم سوف تسعدون بها".

وأضاف: "بستعد لتصوير كليب جديد وإحنا في مرحلة التحضير وأن شاء الله السنه دي هتختم خير و2023 هتكون سنة كلها خير وجمال وسعادة وفيها أعمال كتير اتمني تسعدوا بها".