جلال فهمي لـ "الفجر الفني "هذا هو سر الاستمرارية بيني وبين تامر حسني وعلاقة الصداقة مهمة في نجاح أعمالنا وهذه أعمالي المقبلة (حوار)
جلال فهمي من أهم الملحنين والموزعين في مصر، وهو أيضًا أحد منتجي الموسيقى الأكثر شعبية في العالم العربي، تعاون مع العديد من الفنانين وحقق معهم نجاحات مبهرة من بينهم تامر حسني، وقام بالتوزيع الموسيقي لكل من شذى حسون، ياسمين نيازي إبراهيم عبد القادر، فادي بدر.
وحاور "الفجر الفني "الموزع الموسيقي ومهندس الصوت "جلال فهمي"، وكشف لنا كواليس عمله مع نجم الجيل تامر حسني وسر استمراريتهما سويًا وسبب نجاح جميع أعمالهما، وأيضًا كشف أيضًا عن تأثير علاقة الإخوة والصداقة بين تامر حسني وفريقه عمله، وعن أقرب الأغاني التي قام بتوزيعها، لقلبه، كما كشف أعماله المقبلة.
ما سر الاستمرارية بينك وبين تامر حسني ؟
سر الاستمرارية بيني وبين تامر حسني إن إحنا أصدقاء، حتى قبل ما نشتغل مع بعض وكنا جيران في منطقة واحدة، وإن شاء الله نفضل أصدقاء لآخر العمر.
وما رأيك في علاقة الإخوة والصداقة بين تامر حسني وفريق عمله ومدي تأثيرها على نجاح جميع الأعمال ؟
قرب الفنان من فرقته أو فريق عمله عامة طبعًا ده بيكون له تأثير كبير جدًا جدًا علي نجاح العمل الذي يقدمه الفنان ده، وأيضًا بعيدًا عن هو مين سواء مجال الفن أو غيره من المجالات ؛ لأن العمل الجماعي وتيم الشغل عامة حاجة أساسية جدًا في نجاح أي مشروع.
فكرة تيم الشغل أو العمل الجماعي هو مش بيعتمد على شخص واحد أو دماغ واحدة أو تفكير واحد، لا هو بيعتمد علي أكثر من فكر ودماغ وشخص، وأكثر من رأي لأن طبيعي الرأي ده يكون بيحتمل الصواب أو الخطأ، ففكرة أن الشخص يكون قريب من التيم بتاعه دي حاجه مهمه جدًا جدًا.
و ما تعليقك على الفيديو الذي نشره تامر حسني عندما حدث خطأ غير مقصود في أغنية "يابنت الإيه" في إحدى الحفلات ؟
الفيديو ده انتشر جدًا كنا في فرح وشغالين وعادي حصل خطأ زي أي خطأ عادي جدًا، بس تامر ماشاء الله عليه أذنه رهيبة وجبارة ف أخد باله فبدل ما يعدي ليا الغلطة دي راح ساب اللي بيعمله والفرح والعريس والعروسة، وجالي أنا شخصيًا لإنه عارف إن الغلطة دي مني انا فجالي وابتدينا حوار مع بعض وبالصدفة كان في حد بيصور.
وما هي أقرب الأغاني التي قمت بتوزيعها لقلبك ؟
أي أغنية وزعتها هي قريبة لقلبي ومعنديش تراك مفضل يعني كل فترة بقعد أنقل وأشغل الأغاني بتاعتي.
ما هي كواليس تعاونك مع الفنانين والفنانات الذين عملت معهم ؟
أنا اشتغلت مع فنانين كتير غير تامر حسني، بس يعني حجم الشغل بتاعي معاهم مش كثير زي نجم الجيل، وتامر حسني في شغله معندوش الوقت الكافي الفاضي اللي يخليني أنا ينفع كمان يبقي عندي وقت فاضي عشان أنشغل مع فنان تاني، وكل الفنانين صحابي وحبايبي وبتمني وبتشرف إن أنا اشتغل مع كل الناس أكيد.
وما هو رأيك في إختلاف المزيكا حاليًا عن سابقًا ؟
المزيكا اختلفت بنسبة 180 درجه عن زمان، زي ما احنا كمان كان جيلنا فيه المزيكا اللي قبلنا كان جيل العظماء جيل عبد الحليم وعبد الوهاب ومحمد فوزي وفريد الأطرش وأم كلثوم".
إحنا أكيد كنا بالنسبالهم مزيكا جديدة فكل مزيكا بتيجي ليها الطابع الخاص بيها".
هل تري أنه يوجد أغاني قمت بتوزيعها ولم تأخذ حقها ؟
قصة إن أغنية وزعتها وماخدتش حقها دي مش قادر أحدد من أنهي منظور، لكن في الإنتاج الموسيقي مثلًا فمفيش.
ما هي أعمالك الجديدة ؟
إن شاء الله بإذن الله في كذا حاجة طبعًا شاغلين في الألبوم الجديد بتاع تامر حسني إن شاء الله والفيلم الجديد بتاع تامر حسني.
و أنا عندي المشروع الخاص بيا شركة الإنتاج بتاعتي في موهبتين بقدمهم 2 بنات إن شاء الله يكسروا الدنيا، في فعلًا نزلت تسنيم العايدي قبل كدة وفي بنت تانية مصرية كندية إن شاء الله نعمل حاجة جامدة مع بعض.
