الشرنوبي لـ"الفجر الفني": مضيت "إيجار قديم" قبل ما يتكتب.. والأغاني في المسلسل كانت من اختيارنا كلنا (خاص)

حقق الفنان محمد الشرنوبي نجاحًا كبيرًا بمشاركته في مسلسل "إيجار قديم" وتفاعل معه الجمهور بشكل كبير ومع شخصية طارق

وفي تصريح خاص لـ "الفجر الفني" تحدث الشرنوبي عن دوره في المسلسل وكيفية استعداده لبعض المشاهد وأيضًا كشف لنا عن وجه الشبه بين شخصية طارق وشخصية الشرنوبي.

ترشيح الشرنوبي لمسلسل إيجار قديم 

وقال محمد الشرنوبي، إنه لا يعلم من الذي قام بترشيحه للقيام بشخصية طارق في مسلسل "إيجار قديم" وتحدث قائلًا: "كريم أبو ذكري المنتج كلمني وقعد معايا وشرحلي المسلسل وفكرته اتحمست جدًا له ولفكرته ومضيت المسلسل حتي من غير ما اقرأ مع العلم أنه كان المسلسل لسه متكتبش فيه حاجة".

استعداد الشرنوبي لمشهد وفاة سحس

وتحدث عن مشهد وفاة سحس وكيفية استعداده له قائلًا: "أنا مستعدتش للمشهد بصراحة أنا مش بعرف أعمل الحاجات دي مش بعرف أستعد وأقول أنا قعدت 4 أيام في البيت وقافل علي نفسي عشان الدور أنا مستعدتش ولا حاجة".

وأضاف: "كان المفروض في المشهد ده طارق بيصحي من النوم علي الخبر، ف أنا كنت طالب منهم أني أعمل المشهد ده أول مشهد ويكون بدري، وصحيت من النوم نزلت في العربية كملت نوم لحد ما وصلت وصحيت بنفس شكلي اللي ظهرت بيه في المسلسل وعملت المشهد، حتي قرأته كذا مره لأني مكنتش حافظه عشان مش بحب أحفظ ف قرأته كذا مره قبل ما أطلع أصور وقعدت مع طارق رفعت وهو الحقيقة كان مظبط الجو أني أعمله كويس ف عشان كدة طلع مشهد حلو".

كيفية تعامل الشرنوبي مع شخصية تشبه شخصية ريهام؟

وعن إمكانية تعامل الشرنوبي مع شخصية زي شخصية ريهام في المسلسل تحدث قائلًا: "ولا اعرفها، مظنش أني ممكن أعرف أتعامل مع شخصية مُسيطرة وشخصية عندها عجرفة في الأسلوب وطريقة الكلام لأني معرفش أتعامل معاها بصراحة، وشخصية زي شخصية ريهام دي مش النوع اللي أحب ارتبط بيه".

الأغاني التي قُدمت في المسلسل 

وعن الأغاني القديمة التي قدمها الشرنوبي في المسلسل أوضح فكرتها لـ "الفجر الفني" قائلًا: "الأغاني اللي اتعملت في المسلسل كانت اختيارنا كلنا يعني إذا كان أغنية أمانة عليك دي اختياري وطبعًا هما وافقوا عليه، وأغنية تلات سلامات كانت اختياري ووافقوا عليها، ومثلًا أغنية الشقة الشقة دي بتاعتي وكانت اقتراحي وعملتها أنا وصديق ليا، وآخر أغنية في المسلسل "أنتي الحياة" أنا اللي عملها وكانت اقتراحي لأن كريم أبو ذكري كان طالب مني أغنية للمسلسل ودي كانت أصلًا عندي".

نجاح المسلسل

وعن نجاح المسلسل صرح الشرنوبي قائلًا: "أنا مش بتوقع أنا بتمني، يعني أتوقع أو متوقعش دي حاجة بتاعت ربنا بس أنا دائمًا بتمني النجاح في أي حاجة بعملها وفي الآخر لو أنا مش متوقع أنه مش هينجح مش هعمله، ف أكيد أي حاجة أنا بعملها بتوقع أنها تنجح أو بتمني أنها تنجح وبيكون فيها مقومات النجاح، غير كدة لو منجحتش دي حاجة بتاعت ربنا، أو يكون حد من الصُناع قصر في حاجة، بس الحمد لله المسلسل نجح وكسر الدنيا وعمل شغل حلو أوي".