الشرنوبي عن الشائعات التي لاحقته بعد فيديو الآذان: "الناس مسكت في كلمة وفسرتها على مزاجها!" (خاص)

تعرض الفنان محمد الشرنوبي، للكثير من الانتقادات بعد نشر فيديو له وهو يشرح صوت الآذان في تركيا وقام بوصف صوت المؤذن برعب، ومن خلال "الفجر الفني" رد الشرنوبي علي تلك الانتقادات التي تعرض لها.

وكشف الشرنوبي، في البداية عن رأيه في الانتقادات التي تعرض لها بعد فيديو الآذان قائلًا: "دي مش مجرد إشاعات. الناس بتاخذ كلمة وبتفسرها علي مزاجها أنا قاعد بقول الآذان وبقوله بصوت كويس وقاعد منبهر بالآذان وهو في اسطنبول.. لما روحت سمعت المسجدين بيردوا علي بعض مسجد السلطان أحمد والمسجد اللي قدامه، فكنت قاعد أنا وفيدرا وطارق رفعت المخرج وقاعد بشرحلهم قد ايه الموضوع مُمتع وبيخلي الناس تروح تصلي وهي مبسوطة لأن الآذان الحلو بيجذب الناس للصلاة في المسجد.. أنا وقتها علطول دخلت المسجد أصلي وكنت قاعد بشرحلهم قد ايه الموضوع حلو يمكن خاني التعبير شوية بأن أنا قولت أنه يا جماعة ده حاجة رعب من كتر الحلاوة".

وأضاف: "أنا عندي تعبيرات ممكن تكون غلط شوية أو عكس الحقيقة يعني لما اجي اقول علي حاجة حلوة مثلا بقول يا جماعة دي حاجة (تقرف) من كتر الحلاوة.. أنا يمكن خاني التعبير فهما اخدوا الكلمة دي بس، والفيديو موضح أني مش بهين الآذان بالعكس ده موضح قد ايه أنا كنت منبهر".

وأكمل حديثه قائلًا: "يعني أنا مش قاعد بقلده بسخرية وأقول ده حاجة رعب.. في فرق بين أن أنا أقول كدة وأقول أن الآذان كويس وبشرح هما قد ايه بيردوا علي بعض بطريقة حلوة وشكل ممتع  للأذن والروح، والحقيقة أن خلاص أنا اتعودت علي الناس بالشكل ده والإشاعات اللي بالشكل ده واتعودت كمان علي النوع ده من الفهم والفكر والوعي ده".

رد الشرنوبي على الكومنتات السلبية

وعن مدي تأثير الكومنتات السلبية عليه أوضح قائلًا: "لو مفيش جدال علي شخص والناس دائمًا تفضل تتكلم علي الشخص ده وفي ناس بتحبه وناس بتكره وناس بتُستفز منه وناس تشوفه في الشارع تصوت يبقا الشخص ده مش موجود لو مفيش جدال عليه والشخص ده يكون ملهوش وجود، لأن مجرد وجود جدال واختلاف في وجهات النظر علي أي حاجة أنا بعملها، ف ده معناه أن الحمد لله أنا موجود وناجح ومحقق حاجات كتير ده اللي يفرق معايا بصراحة".

وأضاف: "إنما اضايق من كومنت أو اي حاجه بالعكس لأن مفيش حد عليه إجماع، والحقيقة أن الناس بقت ما بتصدق أنها تلاقي حاجة عشان تنتقدها، وبعدين مش بيدوا لنفسهم فرصة أنهم يفهموا الموضوع بشكل عقلاني، الناس بتاخد كلمة زي رعب وتعمل عليها سيناريوهات بقا محمد الشرنوبي مُلحد أصلًا، اللي هو طيب شوف الفيديو هتلاقيني منبهر بجمال الآذان، بس يمكن الناس بقت تفهم الكلام بشكل حرفي شوية".

أعماله الشرنوبي في 2023 

أما عن أعماله القادمة في 2023 صرح بها قائلًا: "لسه مفيش حاجة أكيدة عندي كذا حاجه بقرأها وبشوف لسه هعمل فيهم ايه، ومفيش اي حاجة واضحة أقدر أصرح بيها".