كريم فهمي عن "أزمة منتصف العمر": عمر بيعاني من المرض النفسي BPD.. وهذا رأي زوجتي في المسلسل

استضاف الإعلامي شريف عامر أسرة مسلسل "أزمة منتصف العمر"، وهم المخرج كريم العدل والنجمان كريم فهمي وريهام عبد الغفور.

وتحدث كريم فهمي، عن نجاح مسلسله أزمة منتصف العمر، مؤكدًا أن الشخصية أرهقته خاصة أنها تعاني من مرض نفسي وهو BPD أو ما يُعرف بـ اضطراب الشخصية الحدية، كما أشار إلى أن العمل مستوحى من قصص حقيقية.

وقال كريم فهمي، عن تفاصيل كتابة مشاهد مسلسل أزمة منتصف العمر، في تصريحات تلفزيونية: على مستوى الكتابة أنا والمخرج كريم العدل، كنا بنتناول موضوعا شائكا جدًا وإحنا اللي كتبنا المعالجة الدرامية، وفكرة الموضوع الشائك أو الخط اللي حصل في نهاية الحلقة الرابعة ياما في حاجات كتير اتعملت كده ومنجحتش لأنها لم تتناول بالشكل المظبوط، ودايمًا طول الوقت كان عندنا فرة إن كل شخصية تبقى حقيقة ويكون جواها خير وشر، حتى الشر اللي جوا الشخصية ده مش عارفة إن فيها شر، وكل شخصية حقيقية جدًا.

كريم فهمي يكشف رأي زوجته في مسلسل أزمة منتصف العمر 

وكشف كريم فهمي، رأي زوجته في مسلسل أزمة منتصف العمر، قائلًا: "لآخر المسلسل عاملين فكرة إن المشاهد مش هيبقى عارف يتعاطف مع مين، ودانيا مراتي كل ما تشوف شخصية سلمى اللي هي هند عبد الحليم تقولي دي اللي مقطعالي قلبي، وفي ناس تانية مش صعبان عليها، يعني في جدال على الموضوع ده.

وأكد الفنان كريم فهمي، أن جميع مشاهد مسلسل أزمة منتصف العمر، تم كتابتها بـ عناية شديدة، قائلًا: كل حاجة مكتوبة في السيناريو وكل حاجة معمول حسابها، والأساس والنظرات كتبناها أنا وكريم العدل في السيناريو، ولما جينا نبنبي الشخصيات كنا مذاكرين كويس أوي الشخصية هتعمل إيه.

كريم فهمي: عمر كان بيعاني من مرض نفسي اسمه BPD

وتابع: لو اتكلمنا على شخصية عمر هو كان بيعاني من مرض نفسي اسمه BPD، واللي اتعرض في المسلسل هو تجسيد للمرض النفسي ده، وكنا مذاكرينه كويس أوي، وأحب أشكر أستاذ صادق الصباح وأنور صادق الصباح، لأنهم أدونا مطلق الحرية في الكتابة.

وأضاف كريم مفهمي، أنه تم تصوير جميع مشاهد مسلسل أزمة منتصف العمر في بيروت، موضحًا: وكريم العدل مصور المسلسل ده كله في بيروت حتى الخارجي بتاعه في بيروت، ودي حاجة صعبة جدًا أن حد يحسسك أن كل أحداث المسلسل بتدور في مصر.

كريم فهمي: أزمة منتصف العمر مأخوذة من قصص حقيقية  

وأكد الفنان كريم فهمي، أن قصة مسلسل أزمة منتصف العمر، مأخوذة من قصص حقيقية، موضحًا: أنا وكريم العدل كنا تقريبًا عايشين مع بعض لمدة 3 شهور، وإحنا بنكتب الشخصيات والمعالجة الدرامية كنا عارفين إحنا رايحين فين، والفكرة مش ف إني أعمل حاجة حراقة، طب الحدث الرئيسي هيوصلني لـ فين؟، وياما بنشوف حواديت فيها أكتر من كده ولكن وحشة وإحنا متناولين الموضوع بمنطق، والمسلسل مأخوذ من أكتر من قصة حقيقية.

كريم فهمي: دوري في أزمة منتصف العمر تعبني جدا وتفاصيل الشخصية صعبة

كما تحدث كريم فهمي، عن تأثير شخصيته في مسلسل أزمة منتصف العمر، على حالته النفسية، قائلًا: دوري في أزمة منتصف العمر تعبني جدًا، وتفاصيل الشخصية صعبة وإني أوصل تفاصيل مرض الـ BPD من غير ما أكون "أوفر" ده صعب جدًا، والتحدي إني بعمل دور مركب وصعب وأخلي الناس تصدقه، خاصة لو معاك غول تمثيل زي ريهام عبد الغفور، كنت بقولها أنا تعبت منك، لأن مفيش مشهد ينفع أتخاذل فيه كأني بلاعب الأهلي.