محمد صبحي: "برامج المقالب مهينة للي بيكون عارف ورايح"

قال الفنان محمد صبحي، إنه امتنع عن مشاهدة دراما رمضان، كما كشف موقفه من مشاهده والمشاركة في برامج المقالب الشهيرة.

وتابع محمد صبحي خلال لقائه مع الإعلامية أميرة بدر ببرنامجها "VIP" المذاع على شاشة «هي»: "مبتفرجش على مسلسلات رمضان لأن عندي مسرح وبروفات، وده مش تقليل، ومعنديش وقت، وحياتنا اتغيرت في رمضان ممارستنا لشعائر رمضان اتغيرت، الظروف الحياتية اتغيرت".

واستكمل محمد صبحي: بقى عندنا ثابت مسلسل كوميدي وحاجات ثابتة، وبرنامج يجيب الناس يهزقهم، وده عصر التفاهة، بعمل بلوك لأي متجاوز على السوشيال ميديا، المسدس والفيس بوك أخطر اختراعين في العصر الحديث، المسدس جعل الجبان يهدد الشجاع، والفيس بوك جعل الجاهل يصحح للمثقف، بقول لتلاميذتي أعمله بلوك متسمحش لحد يهين عقلك، المفروض اكسب منه معلومة 

 .

وأضاف محمد صبحي: مبشوفش البرامج الهبلة المقالب وبقلب عليها على طول، مهينة للي عارف ورايح، كان عندنا برامج مقالب الله يرحم إبراهيم نصر وكان بيتضرب وعمره ما هان ضيف، وإسماعيل يسري برضو.

محمد صبحي يتحدث عن فتيات التيك توك وانضمامهم لمسلسلات مصرية

تحدث الفنان محمد صبحي عن غضبه الشديد، من ظاهرة التيك توك، والذي يشارك من خلاله عددًا من الفتيات في الأعمال الدرامية، مشيرًا إلى أنه يتم تجاهل المبدعين.

واستكمل محمد صبحي حديثه: "انهاردة بنكرم مين البنت اللي بتنجح في التيك توك بتشتغل في 7 مسلسلات مصرية، سيدنا عمر بن الخطاب رضي الله عنه قال اميتو الخطأ بالصوات متقعدوش ترغوا في الخطأ، دايما أقول متودوش الكاميرا لهذا الإسفاف يا جماعة أنتو بتبروزهم عايز الإعلام يروح للبديل أنا أخلق البديل ده يموت، مصر كان فيها أعمال كوميدي تافههة هايفة، ولكن 90 من الباقي يوزنوا عباقرة ومفكرين".

وتابع محمد صبحي: أنا عامل مدرسة اسمها ستوديو الممثل من أكتر من 50 سنة، يجي الجمهور يقول دول فين، هاني شاكر جه وقت أزمات النقابة مع مطربين المهرجانات،  اتفرج على عرض عيط، 12 ولد وبنت مبنشفهمش ازاي ولا كاميرا بتروحلهم وصوتهم جميل.

كما تطرق محمد صبحي في حديثه إلى جنازات المشاهير وما يحدث بها في أثناء التغطية الإعلامية لها، قائلًا: أكون في جنازة ألاقي موبايل مرفوع في وشي يسألني تقول إيه للميت؟ بقولهم أقوله لما أروحله، لا بد أن تكون خريطة ثقافية وإعلامية تؤمن بأنها معول إما سيبني الإنسان أو يهدمه، شبابنا اتدمر خلاص بقى ليه عالم اللي عايش فيه شئ مرعب إن الطفل أكلمه هو مش معايا ومركز مع الموبايل.

وتابع محمد صبحي: احنا مش واعيين بالكارثة لأنها عالمية، اوعى تمشي في طابور الأعداء والدول العظمى، احنا نستطيع أن نكون دولة عظمى نقدر بجد لما يكون السياسة العامة فيها تعليم وثقافة وفن تبني إنسان، ممكن أكون شغال فنان أروح اتبرع اشتغل في مصنع 3 ساعات يوميا عشان بلدي، بناء البشر هو الشئ الوحيد اللي هيقدر يرجعنا تاني،  الأجانب بيعلمونا القرآن علماء أجانب بيستندوا على معجزات حلها في القرآن.

برنامج "vip" يذاع يوميا في شهر رمضان على شاشة "هي" وتقدمه الإعلامية أميرة بدر في تمام السابعة مساءً، وتستضيف من خلاله عددا من نجوم الفن والرياضة في مصر.