كريم مغاوري لـ الفجر الفني: أغلب المشاهد صعبة ونجاح العمل يتوقف على التحضير

تألق الفنان الشاب كريم سامي مغاوري في مسلسل الحاج إكسلانس الذي تم عرضه في الموسم الرمضاني لعام 2023 حيث شارك بشخصية فادي الذي ينصب على صديقه، وكان لنا معه لقاء خاص يكشف لنا عن العديد من التفاصيل

من رشحك لدور فادي في الحاج إكسلانس؟

رشحني للدور محمد سعد انا كنت اشتغلت معاه قبل كده ولما اتقابلنا قالي عايزك معايا واختارنا الدور ده

ماهي العوامل التي جذبتك للدور؟

اللي شدني في الدور إنه حلو ومختلف عن اللي كنت بقدمه قبل كده وشكل جديد انا مقدمتهوش فكنت حابب اقدمه شخصية النصاب اللي حتى لما دوره بينتهي الناس مش عارفة هو نصاب أو لا

حدثنا عن الكواليس وكان غالب عليها طابع كوميدي؟

الدنيا كانت لطيفة وكنا دايما بنبقى قاعدين في اللوكشين مستنيين مشاهد استاذ محمد سعد ونتفرج عليها لاننا كنا بنهلك من الضحك، ثفقة كبيرة وعظيمة وكان في مجهود كبير والحمد لله الناس لما أبتدت تركز على المسلسل بدأت تتكلم عنه

ماهو أصعب مشهد واجهة صعوبة فيه؟

والله أنا أغلب المشاهد صعبة وكان مطلوب مني ان مبينش ان انا نصاب لحد ما الموضوع يتكشف لوحده، فكل المشاهد اللي انا عملتها كانت مأثرة فيا ومركز فيها بس هو الدور مفهوش مينو دراما أو استعطاف عشان يبقى مأثر فيا بشكل نفسي

حديثنا عن تجربتك مع طاقم العمل كله بداية من الفنان محمد سعد؟

طاقم العمل ناس محترمة من اكبرهم لأصغرهم وبشكرهم على المجهود اللي بذلوه من اول رمضان لحد فركش مسلسل وشكرا ليهم جميعا

وجودك مع والدك الاستاذ سامي مغاوري في نفس العمل ماذا أضاف لك؟

بالنسبة لوجودي في العمل واحد مع والده ده شرف ليا ممكن انا وهو نبقى متواجدين في نفس العمل لكن الشخصيات مش بتتقابل ومش بعمل ابنه ولا بعمل اخوه فالشخصيات خطوطها بعيد عن بعض شوية

ماذا يمثل لك أصدقاء الجامعة في  حياتك؟

انا كنت في فنون مسرحية فدول الزملاء وأصدقاء العمر لان احنا بنفضل مستمرين مع بعض العمر كله والمعهد ومابعد المعهد ولما بنشتغل مع بعض في أعمال

في سياق دورك أنك بتساعد صديقك في العمل، مامدى صدقك لجملة الصاحب ساحب؟

في سياق دوري هو مبيساعدش هو نصاب بس كريم مغاوري جدع وصاحب صاحبه

هل في حياة كريم مغاروي صديق جدع يساعد ويسند مثل فادي وأحمد في الحاج إكسلانس؟

أكيد طبعًا ليا أصدقاء جدعان جدا وبيساعدوني في حاجات كتير ربنا يديم علينا حب الناس وعندي صحاب جدعان بيكونوا حاضرين قبل ما أنا أطلبهم

من يكون هو مصدر الدعم والسند في الأوقات الصعبة؟

اكتر دعم في اللحظات الصعبة بتبقى والدي ووالدتي ده اكتر دعم وهما دايما بيبقى رأيهم الأول والاخير بيطلع صح في النهاية

ماهي الرسالة التي ترى أن دورك يريد توصيلها؟

أنا عملت الدور وكأن أنا اللي بلعب الشخصية مفيش رسالة محددة بيبقى عايز اقدمها، بس أكيد الناس تاخد بالها أن تسلم دقنها وفلوسها وكل ماتملك لشخص حتى لو تعرفه بس مش بالثقة دي هي رسالة غير مباشرة

من وجهة نظرك العمل بيكون ناجح داخل الموسم الرمضاني ولا خارج الموسم؟

أنا شايف أن الحاج إسلانس لما هيتعرض بعد رمضان هيحقق بشكل كبير والناس هتغير وجهة نظرها برغم أن المسلسل محقق وفي رد فعل كويس جدا لأن محمد سعد ليه جمهور كبير وقاعدة كبيرة بيفترجوا عليه

ما العوامل التي يتوقف عليها نجاح أي عمل من وجهة نظرك؟

اكتر الحاجات اللي بيتوقف عليها نجاح اي عمل من وجهة نظري هي التحضير من كرو الاخراج وكرو الانتاج قبل المسلسل تحضير كل شيء وان المطلوب في السكريبت يتحقق لا يبقى اقل منه ولا اعلى منه ويبقى المؤلف اللي كاتبه

هل في رأيك المنصات يمكنها أخذ مكان التلفزيون؟

والمنصات بدأت تاخد مكان التلفزيون لان مفيش اعلانات وبنقعد نستنى حلقة ٣٠ ولا ٣٥ دقيقة بنقعد ساعة ونص عشان نتفرج.

هل في أعمال قادمة ليك؟

في مفاجأة جاية عمل كبير هشارك في الجزء الرابع فيه بس مش هقول اسم دلوقتي هقول أني صورت وخلصت ولما يظهر ويقولولنا نتكلم عن المسلسل.