"  عملت مجهود علشان أضرب عادل إمام في فيلم اللعب مع الكبار وداود عبد السيد بيحب الإحساس أوي ".. أبرز تصريحات عايدة رياض

حلت الفنانة عايدة رياض، ضيفة في برنامج " واحد من الناس " مع الاعلامي عمرو الليثي،  المذاع على شاشة الحياة الفضائية، وكشفت  كواليس تصوير مشاهدها مع الزعيم عادل إمام خلال فيلم "اللعب مع الكبار" وذكرياتها مع فيلم "الكيت كات".

كواليس تصوير فيلم اللعب مع الكبار 

قالت عايدة رياض خلال الجزء الثاني من لقائها ببرنامج "واحد من الناس" الذي يقدمه الإعلامي عمرو الليثي بقناة "الحياة": “مشهدي مع عادل إمام لما كنا احنا الاتنين بنضرب بعض المخرج شريف عرفة أخده مشهد واحد، والمشهد ده كان ضرب نار ولا يمكن ينسى، وأنا بعمل بروفة قبل التصوير عادل إمام قال لي خلي بالك واضربي على الهوا ورجلك بس تتفرد مش نضرب شالوت في الجسم، واشتغلنا في تصوير مشهد البوس وبعدين لقيته بيضرب بجد وأنا كنت بقى رياضية رُحت قايمة واديتله بالروسية وعملت مجهود علشان أضربه بالرأس وفعلًا الضرب كان بجد لدرجة إنه قال لي يا بنت اللذينا وبعدين حطني على الترابيزة وبعدها كان فيه”.

ولفتت: "الأستاذ عادل إمام  ميزته إن لو فيه كلوز للمثل هو بيقف له وقليل أوي اللى يعمل كده، وكان يقف قدامي علشان يديني الإحساس صح بالظبط ويبص لي ويعمل لي حركات".

وأشارت: "المشهد بتاع العربية اللي كان دمه خفيف، والمشهد الخطير بتاع مديرية الأمن دا ما يتنسيش طبعًا وجامد جدًّا والقبلات اللي فيه، وعجبني الأكشن بتاع حسين فهمي، ولما اتفرجت على الفيلم أنا نفسي اتخضيت وهو بيدي له المنديل يمسح الروج، كل مشاهد الفيلم كان فيها خفة دم".

كواليس فيلم الكيت كات

واستطردت: "في نفس السنة عملت مع الفنان محمود عبد العزيز فيلم الكيت كات، وهو وعادل إمام عمالقة تمثيل، وشريف عرفة كان شاب صغير وداود عبد السيد أكبر وأنضج وكل واحد له رؤية، الكيت كات فيه بوس وبيقولوا فيلم إغراء والعمل عايش لإن داوود عبد السيد كان يجي لي يفهم لي الفيلم وأبعاده كلها ويقول لي شريف منير دا حب حياتك وعايز أحس إنك بتحبي قلت له حاضر وقال لي عايز واحدة بتحب حد وبتتمناه وفيه حاجات فرشها لهذا الموضوع وقال لي لما تبوسي شريف منير أنتِ فعلًا بتحبيه بجد، وداوود عبد السيد بيحب الإحساس أوي والسينما إحساس أكتر من أي حاجة".

آخر أعمال عايدة رياض

جدير بالذكر أن آخر أعمال عايدة رياض مسلسل ليه لأ 3 الذي تتناول حلقاته قضية اجتماعية هامة، أثارت جدلًا واسعًا بين الجمهور عقب طرحها في المسلسل، وهي أحقية السيدة المطلقة التي تعول أبناء كبار في الزواج مرة أخرى، وبناء أسرة جديدة، بالإضافة إلى قضية التفرقة في المعاملة بين الولد والبنت، وسوء تربية الأولاد وتدليلهم زيادة عن اللازم وتأثير ذلك على سلوكهم.

ويشارك في بطولة مسلسل ليه لأ الجزء الثالث عدد كبير من النجوم والنجمات، منهم: نيللي كريم، صلاح عبد الله، معتز هشام، عايدة رياض، أحمد طارق، نادين فاروق، سامية أسعد، أمير صلاح، حازم سمير، آلاء سنان، هديل حسن، فريدة رحب، وظهور خاص للإعلامية إنجي علي بدور “رانيا”، زوجة والد “ياسين” الذي يجسد دوره الفنان الشاب معتز هشام.