المنتج أحمد الزواوي: اللي فيفي عبده فيه بسببي.. وعجزتها زي ما عجزتني

كشف المنتج أحمد الزواوي، تفاصيل خلافه مع الفنانة فيفي عبده منذ عام 2017، متهمًا إياها بالنصب عليه في 10 آلاف دولار، مؤكدًا أنه لجأ للسحر والدجل حتى يسترجع حقه منها، وأن ما تمر به فيفي عبده من وعكة صحة حالية وخلال السنوات الماضية كانت بسبب السحر الذي أقامه لها.

وقال أحمد الزواوي، خلال حواره مع الإعلامية مروة صبري، في برنامجها “قعدة ستات” المذاع عبر شاشة قناة “القاهرة اليوم”: والله العظيم اللي فيفي فيه بسببي، أنا طلبت حقي بالقانون وبالأصول، وأذيتها زي ما هي أذتني، ولو طولت أموتها هموتها إيه المشكلة؟ مش هي أذتني؟ لو افترضنا أن النص مليون جنيه في 2017، كان كل ما أملك أو تحويشة العمر، وضاع مني يبقى مش مستقبلي ضاع؟ يعني هي تضيع مستقبلي وأنا مأذيهاش؟.

وتابع: في الناس بتقتل أنا مقتلتش، أنا بتعامل بالقانون الإلهي، الجزاء من جنس العمل، وعجزتها زي ما عجزتني، والنهاردة في أجزاء في جسمها مبتتحركش، بكرا في أجزاء بتتحرك هتقف.

وأضاف: فيفي عبده محدش هيحس باللي فيها إلا هي، وهي عارفة جالها إزاي.. يعني هي تروح تتكرم في لبنان وهي واكلة حق الناس؟ أنا أسيبها برضو تتكرم؟ ده عدل ربنا بيقول كده؟ يعني الشكل اللي بتديه للناس وهي واكلة الناس؟

لترد عليه الإعلامية مروة صبري قائلة: عدل ربنا مقالش أننا نأذي بعض، وليه محاولتش تتواصل معاها بطريقة تانية؟، يعني أنت من 2017 معرفتش تكلمها في التليفون؟.

وتابعت مروة صبري مناشدة الفنانة فيفي عبده، قائلة: رجاء من الفنانة فيفي عبده تردي على المنتج أحمد الزواوي، اللي بيقول أنه هو عنده قوة خارقة وأذاكي ولسة هيأذيكي تاني، وعملك عمل، رجاء اطلعي ردي.

وأضاف أحمد الزواوي: أنا عايز حد يديني حل غير القانون، القانون ده خلاص مرحلة وعدت إنتوا كده عايزين تقولوا أن فيفي عبده أقوى من القانون والنقابة، وأنا أتأذيت أكتر منها وكلنا بنمرض وبنقوم بأمر الله، والقانون قال ده تعاقد مش سرقة، وهي ليه مترجعش فلوسي؟.

وردت مروة صبري منفعلة: مفيش حد أقوى من القانون، وأنت كده بتغلط في قانون بلدنا، الاختلاف على الفلوس بيحصل بين أي حد وفي وقتها نتكلم براحة ونشوف وسائط ونروح النقابة للدكتور أشرف زكي الراجل المحترم، مش تروح تعمل لها عمل أنها تقعد في السرير وتمرض.

وقاطع أحمد الزواوي حديث الإعلامية مروة صبري، قائلًا: علني بقولها لو مرجعتش فلوسي متزعلش وربنا اللي أعلم هعمل إيه فيها وكله بأمر ربنا، واللي زعلان عليها يا يدفع عنها يا يقول رجعي الفلوس، وميشغلنيش الجمهور في شيء هو بيأكلني ولا بيشربني الجمهور؟ واللي معترض يطلع ويحل.

واستكمل: لو جالي الـ 10 آلاف دورلا، بأمر الله ترجع زي الفل، وأنا مطلبتش حاجة غير حقي ولا بطلب تعويض، ولا قولت هاتي فلوس علشان أفكك، أنا عايز حقي، والقانون خد مرحلته معايا، وحقي هيجي إمتى لما أموت؟، هعمل أي مقابل أن أرجع حقي.

وانفعلت الإعلامية مروة صبري، وانهت لقائها مع المنتج أحمد الزواوي، قائلة: أنت كده تعديت القانون وإحنا في دولة القانون، ولو أنت حقيقي ليك حق القانون هيرجعهولك، أنا بحترم الدولة اللي أنا فيها والقانون، والنهاردة لما أختلف مع حد أروح أعمل له أعمال وأمرضه وأقعده في السرير؟ إزاي تتهم الجمهور أنه بيساند فيفي عبده دون وجه حق؟ هو الجمهور يعرف إيه غير إنها فنانة محبوبة؟ والقانون هو اللي هيتعامل معاك.