حمزة نمرة: "أغنية رياح الحياة بتحكي عن فترة التجاوز بعد العلاقات الفاشلة"

حل الفنان حمزة نمرة ضيفًا على برنامج «أجمد 7»، مع الإعلامية جيهان عبدالله عبر إذاعة «نجوم إف إم»، للحديث عن كواليس ألبومه الغنائي الجديد «رايق» والاحتفال علي الهواء بإطلاق رابع أغانيه «رياح الحياة».

وبدأ حمزة نمرة حديثه عن قصة أغنية «رياح الحياة» وقال: «بعتبر رياح الحياة من أبرز الأغاني اللي موجوده في الألبوم، وهي بتحكي عن قصة حقيقية عن فترة التجاوز ما بعد العلاقات الفاشلة، وتحدثت مع الشاعر محمود فاروق عن فكرة الأغنية وأننا ننفذها بنوع من الطبطبة الذاتية، ومحمود كتب الكلام مرة واحدة وكان بشكل مُتسلسل وكلام بيسلم كلام، ومقدرتش أشيل جمل كتير».

وتابع: «فكرة التجاوز مش بس بتكون في العلاقات العاطفية لا والاجتماعية أيضًا، ولما جيت أنفذ الأغنية لحنتها واتعلقت بيها وبكلماتها، ودائما بحرص علي أخذ رأي أصدقاء مقربين مني وأثق في رأيهم منهم زوجتي وأولادي، وهما شاوروا على هذه الأغنية بالذات، ولذلك كنت بحاول أعمل أحسن حاجة فيه عشان تطلع للجمهور بشكل كويس».

حمزة نمرة: "أغنية رايق تعبري عني وهي رسالة لكل شخص عايش قلقان"

استكمل الفنان حمزة نمرة خلال الحلقة حديثه عن قصة اغنية رايق وقال: « أول ما بدأنا تحضيرات الألبوم في شهر 10، فكرنا في أغنية يكون فيها حاجة زي رايق، أول ما سمعت الكلمة قولت بس هي دي، وده اللي كنت محتاجه وقتها لأن علطول عايش قلقان وبجلد ذاتي طول الوقت، وكلمة رايق حسيت إن عايز أقولها لنفسي قبل ما أقولها للجمهور».

وتابع: «احنا عايشين في عصر التكنولوجيا والسويشال ميديا مسيطرة علينا، وطول الوقت حاسين أننا متأخرين وناقصنا كتير وفي سباق، وبقول للجمهور في الأغنية استمتع بحياتك دون قلق لأن الواقع غير السويشال ميديا، والحمدلله لقيت ردود أفعال إيجابية تجاه الأغنية وبقول نحاول نعمل توازن وأننا نكون عندنا نوع من الحافز والتطور، وفي نفس الوقت منخليش القلق يسيطر علينا جمعيًا لحد الإنهيار، والمجال الفني يسع كل الألوان، وفي النهاية الحاجة الحلوة اللي بتعيش».

أغنية رياح الحياة

أطلق الفنان حمزة نمرة رابع أغانيه «رياح الحياة»، من ألبومه الغنائي الجديد «رايق»، وذلك عبر قناته الرسمية على موقع الفيديوهات الشهير «يوتيوب» ومنصات الموسيقي المختلفة، وجاءت كلمات الأغنية للشاعر محمود فاروق، ألحان حمزة نمرة، توزيع وميكساج كريم عبد الوهاب، جيتار مصطفي أصلان، باص جيتار أحمد رجب، تنفيذ وتريات أحمد عاطف.

وتقول بعض كلمات أغنية «رياح الحياة»:-

تهبي يا رياح الحياة 
دايما بما لا أشتهيه
واللي السنين مقدماه
غير اللي قولت نفسه فيه
يلاقي قلبي فين دواه
واللي أذاه أقرب ما ليه
ده جرج بيعلم
وصعب تسكن الألام 
وأخرج من اللي فات سليم 
وصعب لما أروح أنام 
ما أفضلش أراجع القديم
طلع مُكلّف العلام
وخدت درس فى الصميم 
ولسه بتعلّم
ركز ياقلبي فى اللي جاي
وألف شكر للي باع
ما صانش حتي بوق شاي 
سلام يا 300 وداع 
واللي لقانا مايساعوش
فخانة الوداع تساع
مشاعرنا مش لعبة 
ماتنشغلش باللي فات
خليك ياقلبي في المفيد 
كبر لأي ذكريات
ركز وبس في الجديد 
لازم نقسم الخانات 
بمين قريب ومين بعيد
الحسبة مش صعبة