بدرية طلبة: "الناس بتعمل أي حاجة علشان تبقى تريند"

انتقدت الفنانة بدرية طلبة، أفعال الأشخاص بهدف الوصول إلى التريند، معربة عن غضبها بسبب استضافة البرامج لهؤلاء الأشخاص وتسليط الضوء عليهم.

وقالت بدرية طلبة، في مقدمة برنامجها “من غير نفسنة” الذي تقدمه مع الفنانة انتصار ونوليا، عبر شاشة قناة “هي”: أي حد بقى يطلع يعمل أي حاجة علشان يبقى تريند، زي مثلًا بتاع الكشري هو على راسي، بس إحنا عارفين إنه بيحلو علشان يطلع تريند نقوم إحنا نساعده؟ يعني نخلي اللي بعده يعمل أي عبط علشان يطلع تريند وإحنا نساعده؟ اللي طالع في السوق خالف تعرف.

وتابعت: أنا كيان كده لوحدي تريند متحرك، وأنا أكتر واحدة بتتقلد مشاهدها على التيك توك.

بدرية طلبة تتحدث عن الإعلام

وأضافت: لما البرامج بتستضيف حد معملش حاجة خالص، الباقي بيقولوا ما نعمل زيه، المهم يكتبوا اسمي، بتاع الكشري ده جاب منين العربية والتليفون اللي معدي الـ 40 ألف جنيه، جيبوه وإسألوه جاب كل ده منين؟، الإعلام لو معبرش الناس دي هتتلم، ومش هيبقى شكلنا وحش أوي قدام الدول، وبشوف تعليقات قاسية أوي. 

من غير نفسنة” برنامج نسائي ساخر يقدمه كلا من الفنانة انتصار وبدرية طلبة ونوليا،  يعرض يوميًا من السبت إلى الثلاثاء، ويقدم عددًا من القضايا الاجتماعية بطريقته الساخرة والخاصة من خلال استضافة عددًا من الشخصيات المؤثرة على السوشيال ميديا والمشاهير والفنانين لمعرفة آرائهم في تلك القضايا.

بدرية طلبة تنصح السيدات

أكدت الفنانة بدرية طلبة، أنها تعتمد على ابنتها في تدبير أمور المنزل، موضحة أنه أصبح لا يوجد رفاهية لشراء أشياء زيادة عن حاجة المنزل.

وقالت بدرية طلبة: " الأول كنت أنزل أجيب طلبات بيتي، ولكن دلوقتي بناتي اللي بيروحوا، والأسعار زادت شوية بقيت الحاجات كل كام يوم مش طلبات الشهر، وكل واحدة تقدر تدبر نفسها، ومبقاش في رفاهية نجيب زيادات.

وتابعت: ما دام أنا مش عارفة أدور الدنيا أخلي زوجي العزيز يدير الدنيا، والناس دلوقتي بقت واعية وعارفة أن في غلاء جامد ومبقتش تشتري زي الأول، الدنيا هديت شوية.

وأضافت: في جيران تلاقيها حالتهم زنقت شوية، إيه المشكلة في الظروف اللي إحنا فيها دي يساعد اللي حواليه؟ الأكل اللي بيفيض.