أحمد علي موسى لـ "الفجر الفني" : لا أخطط للنجاح.. أتمنى التعاون مع كل الفنانين.. وهذا ما تحتاجه مصر لتطوير الفن (حوار)
دائماً اسمه في الأغاني أو تترات المسلسلات يضمن نجاح العمل وهذا يحدث بتكرار في جميع الأعمال، وآخر نجاحاته الفنية هو تعاونه مع الفنان رامي صبري في ألبوم "النهايات أخلاق"، وتحدث "الفجر الفني" مع الشاعر الغنائي أحمد علي موسي وكشف لنا عن آراءه في أغلب الأحداث المتواجدة حالياً في الوسط بالإضافة إلى رأيه فيما تحتاجه مصر لتطوير الفن.
وإليك نص الحوار:-
ما هو سر الكيمياء بينك وبين الفنان رامي صبري ؟
رامي صبري أصلاً الناس كلها عارفاه أنه ملحن من البداية خالص، فنشأت الكيمياء بينا في بداية الشغل بصفتي كشاعر وهو كملحن ف لما بنبدأ نشتغل مع شخص بنعرف طريقة تفكيره ومن هنا جه الإرتباط بيني وبين رامي في الشغل .
هل توقعت نجاح الثلاث أغاني في ألبوم "النهايات أخلاق" وتصدرها التريند؟
في ثلاث أغاني نجحوا في ألبوم السنة اللي فاتت فبنبقي حاطين توقع أو إحتمال أن الأغنية دي هتنزل إن شاء الله وتعمل صدي حلو، بس أنها تنزل وتنجح وتكون تريند بتبقي حاجات ملناش يد فيها هي بتكون توفيق ربنا في الأول والآخر".
من أين أتت إليك فكرة أغنية"جت سليمة" ؟
أفيه جت سليمة موجود جوايا بقاله كتير مش عارف استخدمه ازاي مش شرط يبقي عشان موقف حصل أو حاجة لكن دائما بنحاول نكيف الافيه اللي بنلاقيه على موضوع كويس.
في رأيك، ما السر في انجذاب الجمهور للأغاني الدرامية في الآونة الأخيرة؟
بسبب أن الفترة اللي فاتت كان في دوشة كثيرة حوالينا وكان في أغاني المهرجانات وأغاني من النوع ده اللي هي دوشة بس فالناس ملت فكانت محتاجة ترجع تاني إلى الكلاسيك الفن اللي إحنا بنقدمه.
ما تعليقك على أزمة أغنية "يمكن خير"؟
عمرو مصطفي ورامي صبري هما عشرة عمري، وعلى فكرة هما صحاب وبيحبوا بعض جداً الفكرة كلها أن في ساعات كدة في ناس بتدخل في النص بتبوظ الأمور وتعظمها، وهي في الآخر خالص هي جملة من التراث اليوناني متاحة لأي شخص يستخدمها، وكان لا يوجد سوء نية من اي منهما.
بعد وجود أزمات في جمعية الملحنين والمؤلفين على تراث أم كلثوم، كيف تحافظ على حقوقك الملكية والفكرية من الاقتباس؟
"في قوانين بتحكم ده والعقود الجديدة اللي موجودة دلوقتي في المصنفات الفنية المتاحة حالياً بتسمح أننا نحافظ على كافة الحقوق على حسب الإتفاق ما بين الطرفين، لكن المشكلة كلها في العقود القديمة والاتفاقات القديمة.
والأزمة المتواجدة حالياً هي على كافة أغاني التراث لأنها قديمة وليس تراث أم كلثوم فقط.
هل كل الأغاني التي تكتبها تكون عن حالة معينة تعيش فيها؟
في منهم مواقف كتير بكون عايشها بس هو الشاعر الشاطر اللي بيعرف يستغل كل الحاجات اللي بتمر عليه وأنا دائماً بشبه الشاعر بأنه عامل زي الاسفنجة بيقعد يمتص مشاعر وأحاسيس سواء هو عاشها أو بتتحكيله وبعد كدة بيطلعها على الورق.
بعد انتشارها كثيراً هل ممكن تقدم أغاني مهرجانات؟
لا مش ممكن اعمله مش تحقيراً من النوع ده أو تقليلاً من شأنه والله بس هو مش نوعي أنا محبش أنها تتحط في التاريخ بتاعي، كل واحد بيحب شكل معين.
مَن مِن الفنانين التي تريد التعاون معهم
اكيد كل الفنانين وأي فنان مشتغلتش معاه هيضفلي وهضفله أكيد هبقي حابب اشتغل معاه الحمد لله أنا راضي بكل الفنانين اللي اشتغلت معاهم تقريباً 80٪ أو أكثر من نجوم الوطن العربي ف ده شئ يتحسبلي الحمد لله.
في رأيك، ماذا تحتاج مصر لتطوير الفن ؟
اول خطوة المفروض يعملها وزير الثقافة أنه بس مبدائياً يشوف المصنفات الفنية اللي بدأت تبقي عائق قدام الفنانين المصريين مش عشان حاجة عشان عملية الروتين والتأخير والحاجات الكثيرة اللي بقي الفنانين المصريين ملزمين يعملوها وهما اصلا مش ملزمين يعملوها.
في المقابل بتلاقي أغاني بتنزل على اليوتيوب وبتنجح وبتخاطب فئة معينة ولا بتعدي على مصنفات أو اي حاجة دي مشكلة كبيرة ومن أحد المشاكل.
ومن أحد المشاكل الثانية أننا محتاجين ندعم المزيكا في مصر أكثر من كدة يا جماعة إحنا طول عمرنا كنا القبلة وكنا رقم واحد دائماً مينفعش تتسحب مننا الريادة وتروح ناحية سوريا ولبنان أو أي ما كان الدولة، نسهل الأمور بس على الفنانين المصريين أكثر من كدة شوية.
ما هي أعمالك القادمة ؟
في 3 أغاني نزلوا مع رامي صبري وبحضر أغنية مع كريم محسن وفي تتر مسلسل في رمضان بس الحقيقة مش عارف اسم المسلسل لأنهم لسه مختاروش الاسم من ألحان محمد عبد المنعم وتوزيع خالد نبيل وغناء آدم.
