محمود حجازي لـ "الفجر الفني": عملت مشهد الغرق دون دوبلير وعلاقتي بريهام طيبة
تألق الفنان محمود حجازي في أحدث أعماله الدرامية الذي يعرض حاليًا وهو مسلسل حدوتة منسية والذي حقق به نجاحًا كبيرًا من خلال تقديمه شخصية نوح، وعادة يتألق محمود حجازي في أعماله الدرامية خاصة مسلسل أبو العروسة بأجزاءه الثلاثة.
وكان للفجر الفني لقاء خاص معه كشف فيه عن العديد من التفاصيل في مسلسل حدوتة منسية.
ما الذي جذبك لدور نوح؟
اللي شجعني أن أنا أقبل دور نوح في حدوتة منسية إنه هو دور مختلف وأول ماقرأت المسلسل أنا اتعاطفت جدًا مع نوح، مع شخص ميعرفش أهله ودايمًا حاسس إنه هو غريب وإن هو مش مرغوب منه في وسط أخواته.
فهو شخصية مليانة أحداث ومليانة مواقف وحبيت جدًا أن أنا أمثلها في وسط طاقم عمل كبير والمسلسل ده أنا بحبه جدًا.
ما الذي جذبك عند قراءة سيناريو حدوتة منسية؟
اللي جذبني لسيناريو حدوتة منسية إن في تنوع واختلاف في كل خط موجود، المشاهد يحب يعرف نهاية الحلقات وايه اللي يحصل، وقصة لذيذة جدًا وشدتني كممثل بالذات دوري نوح.
ماهو أصعب مشهد واجهته أثناء التصوير؟
الصعوبات اللي واجهتني مشهد الغرق المشهد اللي كان بينقذ فيه الولد ونط من المركب بجد والأحداث دي عاملناها بجد وعملتها من غير دوبلير، فكان مشهد صعب أوي وكنت شايل همه وعدت على خير ودي كانت من أصعب المشاهد وفيه مشهد تاني في نهاية المسلسل
كيف كان التعاون مع ريهام حجاج كمنتجة؟
أنا بتربطني علاقة طيبة ومحترمة بريهام حجاج، إشتغلت معاها مسلسين كأي ممثلة وده أول عمل للشركة عندها كإنتاج أنا كنت بمثل فيه.
الموضوع بالنسبالي خدته إن ريهام أكيد داخلة عندها هدف وعايزة تقدمه وهي مهتمة جدًا إنها تقدم فن مختلف، ومهتمة جدًا إنها تدي المواهب الحقيقيين فرص بجد وإن هي تعمل شركة قوية وبتقدم عمل كبير لنجوم كبار وتأثر في الدراما وكل ده هدفها وكان واضح أما إتقابلنا وإتكلمنا وباركتلها وأنا مبسوط جدًا إن أول تجربة لشركتها أنا كنت جزء منها
في ظل الأوضاع الراهنة.. هل السفر والغربة تعد حلًا من وجهة نظرك؟
لا مش هو ده الهدف، هو الاوضاع اللي إحنا تخلي الشخص إنه يركز وميضيعش وقتها وتقوم تشتغل سواء كنت هنا أو كنت برا أو كنت في أي حتة أو كنت مع أهلك أو بعيد عن أهلك.
الأوضاع دي محتاجة راجل يكون قدها ويقدر يتحمل المسؤولية، سواء هنا أو برا المهم إن تكون جاهز والمهم إن إنت تكون بتشتغل على نفسك.
في سياق دورك كـ شاب ترك أهله وفي غربة.. بماذا تنصح الشباب؟
كل واحد سايب أهله ومتغرب أقوله ربنا معاك وإنه أكيد بيمر بمشاعر صعبة جدًا وإنه بيفتقد القاعدة معاهم بتفتقد الكلام معاهم، بيفتقد الشوارع اللي كان بيمشي فيها وكل تفاصيل مر بيها أكيد بيفتقدها واللي بيصبره إنه هيشوفهم مرة تانية وربنا معاهم ويرجعوا بالسلامة، واشتغل وكون نفسك صح وإعمل اللي إنت بتحبه وبلدك مستنياك وبلدك عمرها ماهتنساك.
حدثنا عن دورك في مسلسل سر إلهي؟
دوري في مسلسل سر إلهي بعمل دور صعب أوي عنيف جدًا بياخد الأمور بمشاكل علطول وهو إنسان دايمًا بيعمل مشاكل وهيبقى سبب في أذى ناس كتير وسبب في مشاكل كتير في المسلسل.
