منى ممدوح لـ "الفجر الفني": اتفاجاءت بنجاح دور شهد وبشكر المستشار تركي آل الشيخ
تألقت الفنانة منى ممدوح في فيلم ولاد رزق 3 والذي يعرض حاليًا في دور العرض السينمائية ضمن أفلام موسم عيد الأضحى، وحققت نجاحًا كبيرًا بدور شهد مراجيح والذي تصدرت به تريند مواقع التواصل الاجتماعي والسوشيال ميديا.
هل فيلم ولاد رزق أول تعاون بينك وبين أحمد عز وعمرو يوسف؟
أحمد عز إحنا صحاب وأخوات وعلاقتي بيه كويسة من أيام الجزء الأول لفيلم ولاد رزق.
وعمرو يوسف أكتر من أخ ليا وصديقي من زمان جدًا وعملنا إعلانات مع بعض وهو شاطر ومجتهد وعارفين بعض من زمان ومن وقت ما أشتغلنا سوا في مسلسل طرف تالت.
هل كنتي تتوقعي نجاح دور شهد مراجيح بهذه الطريقة وتصدره التريند؟
الصراحة كنت متوقعة نجاح العمل ككل بس اتفاجاءت بنجاح دور شهد بالطريقة دي وإنه بقى تريند مع إن الدور صغير.
لكن كان وجودها مهم ودورها من بداية ظهورها والناس بتضحك فا الحمد لله.
أنا موجودة في الفيلم من الجزء الأول والمخرج طارق العريان اختارني للدور هو اختارني علشان أنا ممثلة كوميدينا بس معاه كان الضحك مختلف وكمان كان مراهن على نجاحي في الدور من الجزء الأول ومشهدي مع أحمد عز ضحك الناس في السينما وعمل صدى حلو.
من وجهة نظرك هل تري أن أدوار الإغراء والايحاءات تعمل على النجاح بشكل أكبر ؟
الإيحاءات دي حاجة موجودة علطول في الشارع وفي كل حتة بيتقال فيها الكلام ده والفيلم كان مجرد للضحك وبنشوف ناس كتير بتقول كده.
هل ترين إنه من الممكن أن يطلق عليكي لقب ممثلة إغراء؟
أنا فعلًا بيتقال عليا من زمان أوي ممثلة إغراء.
ما الرسالة التي تريدين توجهيها للجمهور بعد الانتقادات التي وجهت لدور شهد مراجيح؟
الانتقادات على دور شهد، أحب أقولهم اتفرجوا الأول وشوفوا أدواري في أعمال تانية كتير هتعرفوا إنه دور للضحك وليس للإيحاءات.
ما رسالتك للجمهور بسبب الانتقادات التي وجهت للفيلم بسبب الايحاءات ؟
أحب أقولهم متدخلوش أطفال يتفرجوا على الفيلم بسبب الإيحاءات اللي فيه وهي حاجة موجودة في الشارع، وكان زمان في أفلام الأبيض والأسود حاجات كتير بتتعمل ومكنش في نقد بالشكل ده.
ما رأيك في الادعاءات أن الفيلم دعايا لموسم الرياض أكثر من إنه داعم له؟
موسم الرياض ناجح ونجح من قبل الفيلم، والفيلم بردو في حتة تانية وهو ناجح من أول جزء وعامل إيرادات ونجح، وسعدنا جدًا بالدعم إنه يخلي الفيلم بالنجاح ده، والدعم خلى الأكشن والصورة تطلع كده ووجود تايسون فيوري وهو نجم عالمي مكناش نحلم إنه يكون معانا ووجوده في الفيلم فرق في الأكشن.
وبوجه الشكر للمستشار تركي آل الشيخ جدًا للدعم ده، وأتمنى أبقى معاه في كل الأعمال، ومبسوطة إن السعودية عملت كده لمصر.
وهما بالفعل كانوا ناجحين بس هما دعموا فنجحوا زيادة، وأتمنى إن أنا اشتغل هناك وأتواجد هناك لإنه السعودية والرياض فتحت مجال للموضوع ده في السينما والبرامج، ولو أطلب مني أكيد مش هتأخر خالص.
وأنا بشكره على الدعم اللي ادهولنا والأجزاء الجاية تبقى أحلى وتجيب نجاح أكتر لإن أعتقد إن 220 مليون أول حاجة حصلت في تاريخ السينما المصرية فأتمنى يجيب أضعاف الأضعاف.
وفي نفس الوقت الفيلم إتعمل بشكل حلو، وبرغم من إن دوري صغير بس عمل نجاح وطلع تريند من وقت العرض الخاص أنا مكنتش النجاح ده.
حديثنا عن علاقتك بالفنان عادل إمام؟
علاقتي بالزعيم عادل إمام من زمان من أيام فيلم مرجان أحمد مرجان وطلب مني إني أعمل دور في الفيلم قولتله حتى لو هعدي من قدامك بس أنا موافقة لإنه كان حلم حياتي إني أقابله وربنا حققهولي.
وبعدين هو طلبني أشتغل معاه مسرح وشاركت معاه في مسرحية بودي جارد، وساعتها فاجئني واحتفل بعيد ميلادي.
وهو بيحب يضحك ويهزر طول الوقت وأستاذ عادل قمة في التواضع وبيحب الناس كلها وعمره ما زعل حد منه.
ما الرسالة اللي تريدين قولها لمن يدعون إصابة عادل إمام بالزهايمر؟
عادل إمام بصحة كويسة وهو معندهوش زهايمر وأولاده مش حابسينه زي ما الناس بتقول وأنا كلمته في عيد ميلاده وكان عارفني إن أنا منى وأنا مقولتش إنه تعبان.
حديثنا عن قرابتك بالمخرج الكبير يحيى العلمي؟
أيوة أنا على قرابة منه وهو يبقى ابن عم جوز عمتي سامي العلمي، وعلى قرابة كمان من الفنان حسين الإمام الله يرحمهم.
ما رأيك في فكرة الأعمال الدرامية القصيرة الـ ٥ و١٠ حلقات ؟
أعمال الـ ١٠ والـ ١٥ دي أعملها بدام قصة حلوة ودور مميز ليه لا.
ما الأدوار التي تتمني تقديمها مستقبليًا؟
دكتورة ومدرسة وبنت بلدي وياسلام لو كوميدي بس الكوميديا الحلوة مش الهابطة لازم الورق يكون حلو.
ما الوظيفة التي كنتي تتمني عملها إذا لم تكوني ممثلة؟
مضيفة طيران أو كابتن طيار ليه لا لإني بحب السفر كتير.
